Pih menegor katanja :
„Tahan doeloe kaoe poenja tindakan, orang moeda !” Ia treak sambil brenti dan palangken toembaknja, „sampe di ini wates tana ada kita poenja, menoeroet kita poenja atoeran jang soeda lama berdjalan dengen baik, siapa-siapa jang maoe meliwatin in tempat, haroes lebi doeloe membajar oewang padjek. Satoe orang dimoestiken bajar 20 perak, ketjil besar satoe roepa. Lain dari itoe, orang moesti kombali dan ambil sadja lain djoeroesan jang djadi tananja negrie”.
Itoe orang moeda jang ditegor boekan lain jalah Sin-tjing berdoea Wangpo jang sedeng berdjalan maoe menoedjoe ka Hangtjioe seperti soeda ditoetoerken diatas, tapi mendadak waktoe sampe di itoe tempat, ia djadi koerang mengerti, kenapa djalanan jang begitoe roepa, soeda terang djadi negrie poenja, ada orang jang masi brani mati maoe mengakoe ada djadi wates tananja, dan segala orang jang maoe melintasin disitoe, dimoestiken membajar oewang tjoeke?
Kaloe ia liat keada'annja itoe orang, tida beda seperti orang djahat. Salekasnja Sin-tjing lantes mendoesin kaloe sekarang dirinja sedeng berhadepan sama lain pendjahat jang maoe tjobah halangin perdjalanannja.
„Akoe selama hidoep didoenia, soeda berdjalan antero tempat, belon satoe kali akoe perna bajar oewang sewa tana atawa oewang