„Di Kwietjioe kita ada boeka peroesahan kain kain", kata teroes itoe orang, „ini sobatkoe nama Ong Pih djadi akoe poenia persero, sedeng namakoe sendiri adalah Ong Pah", sambil ia kata begitoe, matanja melirik pada Ong Pih jang berdoedoek diseblahnja.
„Ja, ja, dan siansing poenja dateng di Hangtjoe, apatah tjoema pasiar sadja?" Tanja Tan wangwee.
„Pasiar, poen djoega sama djalanken dagangan", saoetnja Ong Pah, „dan kaloe siansing rasa tida keberatan, barangkali siansing seneng djoega boeat bikin perhoeboengan pada kita?" Ia berkata,
Tan wangwee berdiam sabentar, ia memandang orang poenja paras moeka dengen kadoea matanja jang bersorot aloes.
Sebagi orang jang tida perhatiken itoe penilikan, Ong Pah kemoedian ingserken sedikit tempat doedoeknja, lebi deket pada korsinja Tan wangwee.
Tapi berbareng dengen itoe, Ong Pih lantas tekep moeloetnja itoe orang toea, sedeng Ong Pah jang meliat begitoe, tjepet ia bertjelingoekan ka antero roeangan, dan kemoedian keloearken tali teroes iket kaki tangannja itoe wangwee!
Marika lakoeken itoe kerdjaan begitoe tjepet, sabentar sadja Tan wangwee poenja diri soeda kena diringkoes.
Kaki tangannja di iket, moeloetnja disoem-