-77-
djoega segala prampoean latjoer, jang maoe mengikoet tjoema memandang kedalem kantongnja si lelaki. Setia? Itoe soesa didapet, jaitoe apa jang soeda sering berboekti. Tetapi sekarang, kaloe tida ditoeroet, apa itoe anak tida nanti djadi sakit hati? Lantaran sakit hati lantas djadi sakit badan dan orang sakit lantaran rindoe kebanjakan jang tjilaka. Kaloe itoe anak djadi begitoe? Ini iboe mlengosin moekanja seperti ngeri aken pikirannja sendiri, la poenja anak sebetoelnja kaloe idoep semoea ada anem orang, tapi semoea mati, tinggal saorang sadja, jaitoe Tjan Mo Seng, maka ia sajang boekan patoet, ia soeka toeker djiwanja asal anaknja djadi senang, Dan sekarang ... ia sendiri maoe bikin hati anaknja djadi sengsara menanggoeng rindoe, apa itoe boleh dinamain sajang anak? Kaloe anaknja koerang apa-apa? Dan ia soeda toea? Ia pikir lagi, biarlah sadja itoe anak piara itoe prampoean Djawa, nanti kaloe soeda piara, plahan-plahan ini iboe nanti tjariken anak prawan bangsa sendiri, kendati anak orang miskin sadja, boeat kasi anaknja kawin.
