— 186 —
seboet itoe perkata'an perkara djoedi jang djadi lantaran ia poenja kasoesahan sekarang, sebab ia mengarti, Tjan tida bikin abis brapa banjak, sebenernja sang iboe jang soeda bikin abis, tetapi boeat saorang jang soeda ada bersenang didalem koeboer, Soekmi tida maoe seboet perkara-perkara kadjelekannja.
Ia kata, jang tadinja ia'orang idoep begitoe senang di Bandoeng, sekarang sasoedanja soesa, apa tida lebi baek pinda sadja kalaen tempat?
Memang Tjan djoega ada pikir begitoe. Ia merasa maloe moesti tinggal teroes di Bandoeng dalem kamiskinan hingga pakeannja Soekmi itoe mas inten poen abis didjoe'al. Ia soeda tetep niatnja aken pinda kalaen tempat, dimana? Itoe ia belon taoe. Tetapi kaloe dilaen tempat, ia pikir boleh dagang ketjil-ketjil, atawa bekerdja sama orang, poen tida maloe sebab tida ada jang kenal. Di Bandoeng masa dia bisa bekerdja sama orang atawa berdagang ketjil, tentoe tida bisa.
Ia lantas minta toeloeng pada kenalan-kenalannja, kaloe-kaloe ada orang jang soeka kasi ia ongkos boeat pinda dan ambil over djoega barang-barangnya.
Boeat satoe tempat didjalan besar tempatnja toko-toko, tentoe sadja gampang sekali ditjari
