boeka mata, laloe ditanjain boeat minoem koffie.
Sang iboe menjaoet, dengen soeara merinti, membikin Soekmi djadi terkedjoet, laloe dateng lebi deket dan pegang tangannja, njata panas, ia lantas raba djidatnja, panas seperti api.
„Njonja besar sakit?" menanja dia.
Sang iboe lantas bilang semalem ia tida bisa tidoer, maka kepalanja rasa berat. Soekmi lekas kloear kasi Tjan taoe, dan dengen goegoep Tjan masoek kekamer iboenja diliat betoel sakit, ia tida ajal lagi lekas poeter telefoon minta dokter dateng.
Soeda tentoe dokter tida bisa lantas dateng begitoe pagi, sebab kira poekoel doeablas baroe dokter dateng pegang nadinja itoe orang toea, laloe toelis recept, kemoedian ia bilang pada Tjan, itoe iboe poenja sakit lantaran terialoe tjape dan koerang tidoer, peroet kosong.
Setelah dokter soeda pergi dan boedjang soeda pergi ambil obat, sang iboe soeroe panggil Tjan, maka Soekmi gantiken doedoek diloear. Serta Tjan masoek, iboenja lantas tanja, apa itoe dokter bilang dari sakitnja. Tjan bilang apa jang dokter kata padanja dan bilang djoega boleh djadi lantaran iboenja siang malem doedoek maen.
Sang iboe diam sadja, sebab dalem hatinja memang ia merasa begitoe djoega, kemoedian
