pergi maen diloearan, tetapi diroema sendiri iapoen maen dan tetamoe selamanja banjak itoe semoea moesti dirawat. Satoe-satoe tetamoe moesti dapet makan minoem satjoekoepnja, malahan lebi lagi, jaitoe soepaja orang tida menjomel diloe'aran dan lebi lagi sang iboe pikir soepaja orang tida tjela dia boekan orang mampoe.
Api didapoer tida tadoe padam, dari melek mata sampe djaoe malem, menjala teroes sebab makan sadja bebrapa kali. Baroe abis makan, mangkok piring belon ditjoetji, dateng laen tetamoe kawan maen dari sang iboe, moesti sedia lagi makan. Begitoe sateroesnja.
Dari sebab soeda tida bisa kata satoe apa, Tjan pikir biarin sadja, sama djoega ia maoe ada lebi baek tokonja djadi loedes, kaloe soeda begitoe barangkali baroe iboenja nanti brenti bikin itoe pemborosan.
Na, liat, itoe anak jang begitoe berbakti, berbalik djadi mengamboel, jaitoe lantaran jang djadi iboe maoe maen menang sendiri.
Ia tida ambil poesing lagi, malahan sengadja ia belandja lebi dari oekoeran maoe dikata blandja dapoer sadja koerang-koerang ada doe'a poeloeh roepia satoe hari.
Itoe tempo Soekmi djoega tida ada itoe sempet boeat pikir itoe perkara, sebab ia soeda bersalin
