piara satoe prampoean Djawa jang masi prawan.
Koetika orang-orang menjataken herannja dan ada djoega jang dengen teroes terang soeda tjela padanja, dikataken iboe takoet sama anak, sebab orang laen tentoe tida maoe kasi permisi anaknja piara prampoean laen bangsa sedeng belon kawin dengen bangsa sendiri, ia ampir tida bisa mendjawab, tetapi ia inget boeat toetoep maloenja, ia lantas tjerita begimana Soekmi bikin didalem roema dan perkataan apa jang itoe mantoe Djawa soeda kataken pada baboe dan koki.
Orang orang ada jang lantas pertjaja dan ambil laen haloean dalem bitjaranja tetapi ada djoega jang bilang, boleh djadi lantaran diliat dia orang mampoe dan takoet sama mertoea. Tapi nanti, boleh liat sadja, orang djawa, ach, liat sadja!
Kaloe ia dapet itoe perkataan, lantas timboel djoega djeloes dalem hatinja dan moelain lagi timbang- menimbang aken Soekmi, tetapi nanti kaloe sampe keroema dan dapet liat Soekmi poenja rnoeka begitoe manis, menjataken hati jang baek dan toeloes, ilanglah ia poenja djeloes itoe dan ia seselin diri sendiri, kenapa ia masi djoega bisa dapet pikiran djelek boeat ini orang jang tida ada tjatjat barang sedikit?
