- 126 -
bertrima kasi dalem hatinja.
Adatnja sebegimana dari bermoela, tida sekali beroba, belon perna kaloe soeami dengen mertoeanja doedoek makan ia tida berdiri menoenggoe, sendokin nasi, toeang aer di glas dan laen!aen. Tetapi kaloe ia diadjak doedoek makan bersama-sama, selamanja ia menampik, selamanja ia doedoek makan bersama koki dan baboe.
Kaloe koki menanja, kenapa ia tida maoe doedoek makan dimedja bersama njonja dan baba, ia bilang, boekan patoetnja begitoe, kendati sama mertoea bangsa sendiri tida patoet begitoe; seperti dia soeda ikoet Tjan, boekan sekali kerna kepengen djadi tinggi, hanja lantaran menoeroet hati jang tjinta. la djoega sering liat ada prampoean Djawa dipiara orang Tionghoa atawa Olanda, lantas sadja banjak tingka, maoe harihari pake kasoet, pake bedak, pake badjoe kabaja renda, maoe plesir, pergi nonton segala apa; sebab di biasain begitoe, itoe prampoean djadi males, kaget ia dilepas atawa lakinja mati, lantas bingoeng, tida bisa bekerdja, sebab soeda biasa senang-senang sadja, achirnja djadi dapat soesa besar, dan tiada koerang djoega jang lantas djadi orang djahat.
Ia boekannja harep nanti dilepas atawa harep jang Tjan mati lebi doeloe, itoe sama sekali
