VIII.
Baroe dapet mengarti
Itoe malem koetika ada berdoea sadja didalem kamer, kedoea iboe dan ajah itoe ada bitjara pelahan dari hatinja Soekmi. Sang iboe oelangken perasaan hatinja, ia bilang kesian itoe anak, jang sekarang soeda tida ada poenja iboe bapa lagi, tjoema ada satoe soedara prampoean sadja.
Kaloe diliat matjemnja sebegitoe roepa, boleh dibilang ada orang alim hingga sajang sekali jang dia ada saorang Djawa, biar begimana djoega djadi koerang sembabat. Tjoba kaloe dia orang Tionghoa, tentoe ia girang sekali dan aken bikin pesta besar, sebab ia tjoema ada itoe satoe anak dan ada poenja kemampoean serta ada banjak sobat-sobat, soeda tentoe pestanja aken djadi rame sekali.
Sekarang, namanja dapet mantoe, tetapi dengen sepi soenji sadja, ia tida brani banggaken pada orang banjak, jang ia sekarang soeda ada poenja nona mantoe dan boeat selama-lamanja tentoe
