― 61 ―
„Tempo Boto masi ketjil, sering dateng si mendjoealan ka roemanja, maka Boto kenal roepanja.
„Kaloe begitoe goea boleh kasi loe oepa !“
„Oepa apa si, Tjia Gwee Tje Go soeda deket!“
„Engga bisa!“
„Kaloe engga bisa, bisain djoega, sebab kaloe soeda sampe waktoenja, kreta api misti brangkat!“
„Loe gila To, apa loe kira goea kreta api ni !„
„Bole di oepamaken seperti kreta api, jang soeda dipasang railnja ?“
„Rail apa si ?“
„Apa lagi, kan Memeh soeda trima oewangnja lima ratoes roepia, kaloe saja si saja engga maoe djadi bini moeda orang, kendati saja poenja soeami miskin, ada lebi senang !“
„Abis kaloe orang toea soeroe masa kita berbanta ?“
„Kenapa si kita misti toeroetin adja kemaoeannja, orang toewa, apa jang kita pikir tida betoel!“
„Ja, baek! Tjoba nanti goea liat loe begimana!“
Bole liat! Biar Boto boleh djadi mati djoega Boto engga maoe djadi bini moeda orang!“
„Bole apa si asal sadja goea dia bli-in barang-barang mas inten jang besar-besar!“
„Kaloe orang soeka kata, laen orang laen pikirannja, itoe ada betoel sekali, tjoba liat adja, Entji poenja pikiran sama Boto berbeda djaoe!“
„Ja da ! goea taoe loe bakal djadi Njonja Keng Hok, Njonja senseh Tiong Hoa Hwee Koan!“ sahoet si Manis dengen soewara menjindir, seperti orang jang maoe hinakenpada itoe anak moeda, kerna ia taoe jang pakerdjahan mendjadi goeroe sekola tida sebrapa gadjinja, maka ia kira toendangannja si Boto tentoe tiada mampoe bli-ken barang-barang
