― 60 ―
ingin roba platoeran koeno, telah berpake badjoe Pekie, kerna pada itoe waktoe, sebagimana pembatja telah mendapet taoe, Perhimpoenan Tiong Hoa Hwe Koan soeda di diriken, aken tetapi badjoe kebaja pendek pake renda ampir tida saorang prampoean Tiong Hoa di kota Betawi brani pake seperti pada waktoe sekarang Badjoe kebaja renda soeda mendjadi seroepa pakean, jang semoea Tiong Hoa Hoedjin dan Siotjia perloe sediaken boeat di pake aken pegi di mana-mana medan pesta.
Di depan roemanja Entjim Asie poen ada rame banjak orang Islam berdiri menonton, topeng jang telah di panggil oleh Entjim A Sie jang baroe trima oewang terkedjoet, hingga ia djadi sedikit rojal.
Itoe doewa gadis, si Manis dan si Boto ada berpakean serba baroe; lantaran ini doea anak prampoean ada berparas éilok, hingga roepanja ada keliatan sebagi bidadari; siapa jang liwat di depan roemanja, ia orang tentoe awasin pada doewa anak prawan itoe; dan ada djoega bebrapa anak moeda jang beridoeng poeti, lantaran ingin meliat moekanja itoe doewa bidadari soeda dateng ka itoe roema boeat membri slamat Taon Baroe pada itoe pamadatan, ajahnja dari itoe doewa gadis, maski ia orang tida begitoe kenal pada Entjek Asie.
Poen Baron Lim telah liwat dengen sengadja di depan roemanja Entjek Asie dengen haek kreta koeda besar, boeat toendjoeken kekajahannja pada itoe gadis jang bakal djadi ia poenja djinge.
„Toepa Tji, itoe dia bakal djadi Entji poenja Baba !” berkaok si Boto, koetika ia meliat itoe anak moeda didalem kreta.
„Bisa adja loe, To, dimana loe bisa taoe, siapa namanja itoe orang moeda ?” menanja si Manis jang mendjadi sanget girang, tatkala ia mendapet kenjatahan, bahoewa bakal ia poenja Baba ada anak orang hartawan besar.
