— 59 —
Sasoedanja trima itoe oewang, Embok Saleha lantes pergi lagi ka roemanja Entjim Asie, dan kasiken itoe oewang ampat ratoes toedjoe poeloe lima roepia.
Djalannja hari ada begitoe tjepet, hingga dengen sekedjepan sadja soeda sampe pada hari Taon Baroe Tionghoa.
Tjia Gwee Tje-It, ada hari baek boelan baek, maka semoewa orang-orang Tionghoa telah riasin ia orang poenja roema dengen bagoes serta sediain koewe-koewe boeat soegoeken marika poenja tetamoe-tetamoe, jang dateng membri slamat.
Sadari djem doeablas malem, disana-sini soeda kedengeran soewara moesik, semantara ada banjak orang. orang Tionghoa jang pasang petasan beroentoen-roentoen, hingga djem anam pagi soeda mendjadi sanget ramenja dengen segala. matjem tontonan-tontonan jang di itoe taon kloear mengamen seperti Liong, Barongsai Pakkoen, Tjengge, Bangsawan, Wajang-tjok ek, Topeng dan Najoep.
Dimana-mana djalanan-djalanan besar kliatan banjak sekali segala matjem kandaran seperti kreta landauer, kreta mijlord, kreta tenda, deeleman dan sado band karet, [1] didalem kandaran mana ada berdoedoek orang-orang jang maoe pegi koendjoengken roemahnja ia orang poenja familie dan sobat ande boeat membri slamat Taon Baroe.
Pada itoe masa badjoe Thengsha dan Kinsin bersama Kopia Batok dan Kasoet Beng eh masi terpake oleh banjak orang Tiong Hoa, kerna pada waktoe itoe blon ada lima percent di antara orang-orang Tiong Hoa, jang telah boeang ia poenja periasan kepala (Thauwijang), sedeng pada fihak prampoean badjoe koeroeng masi amat di soekai oleh Tiong Hoa Hoedjin dan Siotjia, tetapi ada djoega Njonja-Njonja dan Nona Nona bangsa Tiong Hoa, jang
- ↑ Pada itoe waktoe di dalem kota Betawi tjoema ada bebrapa automobiel dan blon terpake oleh orang-orang Tiong Hoa hartawan.
