Boekoe Tjerita Graaf de Monte Christo - Seri 5/XX
XX
PAKOEBOERAN DI BENTENG D'IF
Di atas bale pembaringan ada terletak maitnja Padri Faria ijang telah dimasoekken ka dalem karoeng kaen keper. (teks tidak terbaca) itoe dengen merasa antjoer hatinja, laloe ija berdoedoek diam dekat itoe mait. la merasa, ijang sekarang ini ija ada sendirian kombali seperti di tempo doeloe. Ia poenja niatan aken boenoeh diri, ijang doeloe hari telah dihilangken oleh Padri Faria, sekarang ini timboel kombali.
„Kaloe akoe bisa mati." kata Dantes sendiri-diri: „akoe nanti tjari sobatkoe ini, dan tentoelah djoega akoe nanti bertemoe kombali padanja. Tapi tjara begimana memboenoeh diri? Akoe rasa, baeklah dengen djalan begini: Akoe tinggal diam di sini, dan boenoeh orang ijang masoek paling doeloe, hingga akoe nanti mendapet hoekoeman mati."
Aken tetapi baroe sadja habis berkata bagitoe, Dantes itoe lantas mendapet pikiran lain, dan merasa ingin tinggal hidoep dan terlepas dari pendjara.
„Berangkat mati!" katanja poela sendiri-diri : „tida! sekali-kali akoe maoe! Kaloe akoe maoe mati, boewat apakah akoe tinggal bersangsara sampe sekarang! Doeloe akoe telah tjari kamatian; tapi sekarang akoe tida maoe! Tida! hanja akoe maoe tinggal hidoep dan dapatken kombali kesenangan. Sebelon akoe mati, akoe misti menghoekoem doeloe pada orang-orang ijang telah berboewat hianat padakoe, dan brangkali djoega akoe nanti bisa berboeat baek pada sobatsobatkoe. Tapi ach! tentoelah djoega orang soedah loepa padakoe dan akoe tida nanti bisa kaloewar dari sini, kaloe belon djadi seperti ini Pendita!"
Sehabisnja berkata begitoe, Dantes tinggal berdiam, selakoe orang ijang ditinggalken oleh soemangat; aken tetapi dengen sekoenjoeng-koenjoeng ija memegang pada kapalanja sendiri selakoe orang ijang merasa poejang, laloe ija djaran moendar-mandir dan lantas berdiri diam di depan bale pembaringan.
„Oh!" katanja poela: „siapatah telah membri ingatan ini padakoe? Allah sendiri? Ja, sedang orang ijang mati boleh kaloewar dari sini, biarlah akoe gantiïn orang ijang mati."
Setelah habis bilang begitoe, lantas sadja Dantes boekaken djaitannja karoeng itoe dengen piso bikinannja Faria, kaloewarken mait Pendita itoe ijang teroes ija bawa pergi ka dalem ija (Dantes) poenja kamar dan rebahken di atas bale pembaringannja; kemoedian ija lilitken sepotong kain di sepoetar kapalanja Faria, sebegimana ija biasa berboewat sendiri, laloe ija selimoeti badan Faria itoe dan hadepken moeka Pendita itoe ka tembok, soepaja cipier dateng bawa makanan di waktoe sore, cipier ini nanti sangka, ijang ija (Dantes) ada lagi tidoer sebegimana biasanja. Habis berboeat begitoe. Dantes itoe lantas pergi kombali ka dalem kamar Padri Faria, mengambil djaroem dan benang, laloe masoek ka dalem karoeng dengen membawa piso, dan djait kombali karoeng itoe dari sebelah dalem.
Dantes soedah berboewat begitoe dengen tida menoenggoe doeloe sampe hari soedah djadi sore, kerna ija takoet nanti Gouverneur dapet lain ingatan dan soeroeh kaloewarken mait Padri Faria dari dalem itoe kamar: kaloe sampe djadi begitoe, tentoe poetoeslah harepanja. Sekarang Dantes itoe soeda tetapken niatannja begini:
Saändenja orang-orang ijang maoe mengoeboerken mait, mendapet taoe, ijang ija-orang ada pikoel badan hidoep, Dantes tida nanti kasih marika itoe tempo lagi boewat tetapken kombali hatinja ijang kaget, sigra djoega ija nanti lantas belèk dengen tjepat karoengnja itoe, dan laloe kaloewar boewat berlari pergi; kaloe marika itoe maoe memegang padanja ija nanti menikam pada marika itoe.
(teks tidak terbaca) dibawa ka koeboeran, ija nanti mandah sadja dikoeboerken; dan dari sebab hari gelap, kaloe sadja orang soeda berlaloe, Dantes nanti kaloewar dari koeboeran dengen kisar-kisarken tanah oeroekan ijang belon djadi keras. Ia harep sadja, tanah itoe tida nanti ada terlaloe tebal. Kaloe ija tida bisa kaloewar, dari sebab terkoeboer dalem, ija nanti mati lantaran engap, dan habis perkara.
Kaädaännja Dantes di itoe waktoe ada berbahaja sekali; kerna tentoelah ija mendapet soesah besar, kaloe cipier dateng di waktoe sore bawain ija makanan dan dapetken mait Padri Faria di atas bale pembaringannja. Soekoerlah djoega soedah sering kali cipier itoe dapetken Dantes sedang rebah. Pada waktoe ijang soedah-soedah, kaloe cipier itoe dapetken Dantes ada rebah, ija taro sadja barang-barang makanan di atas medja, laloe berdjalan pergi dengen tida berkata satoe apa; maka adalah diharep oleh Dantes, ijang ini kali nanti djadi djoega begitoe.
Pada waktoe ampir poekoel toedjoeh, sangetlah Dantes merasa koewatir; kerna pada waktoe itoelah cipier biasa dateng.
Sesoedahnja lama waktoe itoe berlaloe dan tida ada kadengeran soewara apa-apa, baroelah Dantes merasa senangan sedikit. Ia merasa, ijang ia telah terlepas dari bahaja ijang pertama; itoelah satoe alamat baik. Achir-achirnja, pada waktoe ijang telah ditentoeken oleh Gouverneur. Dantes denger soewara kakinja orang ijang mendatengi. Ija merasa, ijang sekarang telah dateng waktoenja aken ija melaga mati; maka ija tetapken hatinja ijang sangat berdebar-debar, dan dengen sebrapa boleh tahan-tahan napasnja; Pintoe diboekaken, dan doewa orang ijang pikoel satoe bale ketjil taro bale itoe di tanah, sedeng orang jang ka. . .ga ada pegang lantera dan berdiri di pinggir pintoe. Itoe doewa pemikoel mengamperi pada pembaringan, laloe angkat itoe karoeng ijang dikira olehnja ada berisi mait dan taro itoe di bale ketjil, sedeng Dantes kakoeken badannja sendiri.
„Akoe tida sangka. ijang ini Pendita koeroes ada begini berat." kata satoe pemikoel.
„Orang bilang," kata pemikoel ijang kadoewa: „pada saban tahon beratnja toelang ada bertambah satoe pond."
- „Apa kaoe soedah ikatken ?" Kata orang ijang laen.
- „Boewat apatah diikatken di sini ? apa tida djadi tambah berat aken kita-orang? Sampe di loewar, baroelah kita ikatken."
- „Bener sekali ingatanmoe; marilah kita berangkat."
- „Apatah djoega ijang bakal diikatken ?" kata Dantes di dalem hati.
Sedang begitoe. ija digotong naik di tangga, dan sigralah djoega ija dapet rasai angin ijang dingin dan ija merasa senang sekali. Sesoedahnja berdjalan poela bebrapa poeloeh langkah, pemikoel-pemikoel itoe taro lagi di tanah, dan satoe dari marika itoe lantas berlaloe. Dantes denger boenji sepatoenja orang itoe di batoe.
„Di manatah akoe ada sekarang ini?" kata Dantes di hati sendiri.
Sedang begitoe, itoe satoe pemikoel ijang tadi djalan berlaloe, berkata pada orang ijang bawah lantera :
„Terangilah akoe di sini, he, kerbo! akoe tida bisa dapetken apa ijang akoe tjari, kerna gelap."
Kemoedian Dantes denger orang itoe berkata poela : „Ha !(teks tidak terbaca)"
(teks tidak terbaca) lagi Dantes danger boenjinja barang berat ijang ditaro di dekat kakinja di atas bale, dan di itoe waktoe djoega, ija merasa betisnja diïkat.
„Soedah kaoe ikatken ?" tanja pemikoel ijang satoe pada temannja.
„Soedah!" sahoet si teman.
Kemoedian bale itoe digotong kombali. Sesoedah berdjalan bebrapa poeloeh langkah, orang itoe berenti poela; satoe pintoe diboekaken, dan itoe bale teroes digotong lagi.
Sesoedah digotong djaoeh djoega, Dantes denger boenjinja ombak-ombak laoet ijang memoekoel pada batoe karang, di mana itoe benteng d'If ada terdiri.
„Bakal hoedjan besar sekali !" kata pemikoel ijang satoe.
„Ja," sahoet temannja: „ini Pendita boleh djadi kabasahan."
Kemoedian pemikoel-pemikoel itoe lantas tertawa keras.
„Ha! di sini boleh! brentilah !" kata poela itoe pemikoel ijang tadi.
„Madjoe doeloe !" sahoet temannja: „di sebelah sana lebih baik. Apa kaoe tida ingat itoe, ijang paling belakang Soedah menjangkoet di batoe karang, hingga Gouverneur gegeri kita?"
Sesoedah orang berdjalan lagi sedikit, Dantes merasa dipegang di kapala dan di kaki, laloe diangkat dan diajoen-ajoen.
„Satoe! doewa! tiga!" kata satoe pemikoel.
Di itoe waktoe Dantes merasa melajang di awang-awang hingga ija djadi amat kaget. Kemoedian ija merasa terdjoen ka bawah dan tertjeboer ka dalem ajer ijang amat dingin, hingga ija djadi triak, kerna terkedj(teks tidak terbaca)
Dantes itoe soedah dilimparkea ka dalem laoet, sedeng satoe pelor ijang 30 pond beratnja, ada di gandoelken pada betisnja.
Laoetanlah ijang djadi pekoeboeran di benteng d'If.