Boekoe Tjerita Graaf de Monte Christo - 6.pdf/Isi

Pada waktoe ada kilat kombali, Dante dapet lihat di praoe itoe ampat orang ijang peloeki tiang a1 Jan seorang ijang pegangi gagang kamoedi ijang telah patah. Njatalah orang-orang itoe ada melihat djoega pada Dantes, kerna ija- orang dengen triak aken mentinta toeloeng, ada terdenger oleh Dantes.

Dengen sekoenjoeng-koenjoeng tali-tali lajarnja praoe itoe telah poetoes, dan sekalian lajarnja lantas linjap terbawa angin. Di itoe waktoe Dantes denger soewara triak ijang mengantjoerken hati ; kemoedian ija lantas dapet lihat, di terangnja kilat, ijang itoe praoé telah petjah dan orang-orang pada kalelap di ajer. Pada waktoe ada kombali kilat semoewa itoe soedah tida kalihatan lagi. Lama djoega Dantes memandang pada laoetan, sambil memasang koeping, tapi tida djoega ija dapet lihat, dan denger apa-apa, lain dari ajer laoet dan goemoeroehnja ombak-ombak.

Dengen perlahan angin moelai tedoeh, mega-mega melajang ka pihak koelon, hingga langit ijang tadi hitam, sekarang ini kalihatan biroe, bintang-bintang poen bergoemilap terang. Sigra djoega di pihak wetan kalihatan tjaja siang, laloe poentjaknja ombak-ombak di laoet kalihatan bertjaja mas.

Mata-hari terbit!

Dantes tinggal berdiam dengen tertjengang seperti ija baroe sekali taoe melihat mata-hari ijang gilang-goemilang; dengen sebenernja djoega boleh dibilang ijang ija soedah ampir loepa sama roepanja dan moelianja mata-hari dan moeka boemi, kerna sadari tertoetoep di benteng d‘lf, tida sekali ija melihat itoe. Ija berbalik ka pihak benteng d‘If pan melihat koeliling di moeka laoetan, kemoedian benteng itoe kalihatan olehnja seperti ada terdiri di ombak-ombak laoet, ijang di itoe waktoe soedah tida bergontjang keras, semingkin lama, djadi semingkin tedoeh.

Dantes mendoega, ijang di itoe waktoe ada ampir poekoel lima.

„Di dalem tempo doewa atawa tiga djam lagi,“ kata Dantes sendiri-diri: „cipier nanti dateng ka dalem kamar toetoepankoe dapetken maitnja Faria, hingga lantas djoega ija nanti berlakoe riboet; kemoedian orang nanti dapetken itoe lobang atawa gang di dalem tanah; orang nanti periksa itoe orang-orang, ijang telah limparken akoe ka dalem laoet dan tentoelah djoega soedah dapet denger triakkoe. Dengen sigra soldadoe-soldadoe ijang bersendjata, nanti menjoesoel padakoe dengen bebrapa praoe. Sedeng begitoe mariam nanti diboenjiken, aken bri taoe Pada orang di segala tempat, bahoewa tida boleh orang membri toeloengan pada pelari ijang terlandjang. Sekalian mata-mata dan hamba politie di Marseille nanti dapet perintah aken tiari akoe di pasisir, sedeng Gouverneur benteng d‘If nanti soeroeh orang tjari akoe di ini laoet. Di darat dikepoeng, di laoet dikepoeng, apatah ijang nanti djadi dengen dirikoe ini? Akoe kalaparan, akoe kadinginan, malah akoe soedah boewangken djoega pisokoe, ijang djadi sangkoetan aken akoe berenang; dirikoe ini sama djoega tepasrahken pada orang laoet, ijang tentoe nanti paling doeloe melihat padakoe dan nanti serahken akoe pada politie, soepaja dapet tarohan doewa poeloeh frank. Akoe lelah dan bingoeng. Ach, Allahkoe, Allahkoe!lihatlah tjara begimana dirikoe ini bersengsara, dan brilah pertoeloengan!”

Sedeng begitoe, Dantes dapet tihat Satoe kapal ijang mendatengi dari djaoeh dan baroe kalihatan lajarnja sadja, seperti sajapnja boeroeng-laoet ijang poetih; melinken orang pelajaran sadja bisa liat, bahoea itoe satoe kapal adanja.

„O!“ kata Dantes: „di dalem tempo setengah djam akoe berenang sampe ka kapal itoe; tapi akoe koewatir nanti diperiksa dan nanti di kenali seperti satoe pelari laloe akoe dibawa poelang ka Marseille. Apatah akoe misti perboewat, apatah akoe misti bilang? Hikajat apatah akoe misti tjeritaken, soepaja omongankoe boleh dipertjaja? Akoe taoe, bahoewa orang-orang kapal ini toekang lakoeken perniagaan seloesoepan, sambil djadi djoega badjak laoet; dengen melaga berlajar di pantei laoet, marika itoe membegal di pasisir; tentoelah djoega ija orang lebih soeka serahken akoe pada politie dan mendapet oepahan, dari pada berboewat amal padakoe. — Biarlah akoe menoenggoe. Tapi, adoeh! akoe sanget lapar; di dalem bebrapa djam lagi tentoe sekali tenaga akoe djadi habis! lain dari begitoe, waktoenja cipier dateng di kamarkoe soedah ampir sampe. — Akoe rasa akoe nanti bilang sadja ijang dirikoe ini satoe dari antara itoe orang-orang pelajaran, jang tadi pagi telah dapet katjilakaan, dengen lantaran praoe terpetjah di tengah laoet; tida seorang nanti bantah bitjarakoe, kerna sekalian orang pelajaran itoe soedah djadi mati di laoet.

Sambil mengomong begitoe sendiri-diri, Dantes melihat ka tengah laoet laloe dapet lihat satoe kopia merah ijang menjangkoet pada batoe karang, sedeng bebrapa potong balok dan papan ada ngambang dan bergojang-gojang di dekat karang itoe. Semoewa itoe berasal dari itoe praoe tjang terpetjah di waktoe pagi.

— Di itoe waktoe djoega Dantes lantas toeroen ka ajer dan berenang menoedjoe pada itoe kopia merah, ijang sigra djoega dapet diambil dan dipake olehnja; kemoedian ija ambil sepotong papan, laloe berenang ka djalanannja itoe kapal ijang kalihatan olehnja.

„Sekarang akoe katoeloengan,” kata Dantes sambil berenang. Sigralah djoega ija soedah dapet lihat badannja kapal, ijang dateng semingkin dekat padanja. Sedeng ada di poentjak ombak, Dantes angkat kopianja ka tinggi, seperti satoe pertandaan aken minta toeloeng; tapi tida ada satoe orang kapal ijang melihat padanja. Ija maoe triak, tapi ija rasa pertjoemah, kerna soewaranja nanti terhilang di antara boenjinja ombak-ombak ijang memoekoel satoe pada lain.

Ija merasa soekoer sekali, ijang ija soedah mengambil satoe papan aken digelendoti; ija poen ada merasaj lelah, hingga ija tida nanti bisa benenang sampe ka itoe kapal, dan djikaloe kapal itoe berbalik menoedjoe ka pihak lain, ija (Dantes) tida nanti bisa berenang-balik ka darat. Aken tetapi kapal itoe dateng semingkin dekat, dan sigralah djoega orang kapal dapet lihat pada Dantes itoe.

Di itoe waktoe djoega Dantes dapet lihat orang toeroenken satoe praoe dari kapal itoe, dan doewa matroos lantes melompat ka dalem itoe praoe, laloe teroes mendajoeng hingga praoe itoe djalan menoedjoe mengamperi padanja.

Oleh kerna merasa girang, Dantes lantas lepasken itoe sepotong papan, ijang ija rasa tiada perloe lagi dan lantas ija berenang dengen tjepat mengamperi pada praoe jang mendatengi padanja. Dantes itoe soedah pertjaja pada ija sendiri poenja kakoewatan, sedang di itoe waktoe badan ada lelah; maka sigralah djoega ija merasa, bahoewa itoe sepotong papan ada amat bergoena aken dia, tapi sekarang papan itoe telah teranjoet djaoeh dari padanja. Ija merasa, ijang kaki dan tangannja moelai kakoe, ampir tida boleh berenang, sedeng napasnja moelai pendek.

Di sitoe ija triak dan itoe doewa matroos lantas penggajoe lebih keras; sedeng seorang dari padanja itoe triak pada Dantes: „Tetepken hatimoe!”

Dantes denger triakan itoe, betoel pada waktoe satoe ombak dateng memoekoel padanja dan ja tida ada poenja kakoewatan aken kelip; sebab begitoe ija moelai djadi kalelep dan bergelabakan di ajer selakoe orang ijang bingoeng; ija triak aken kadoewa kali, laloe ija merasa tenggelem ka dasar laoet. Kerna berkoewat-koewat dengen sahabis-habisnja tenaga, ija menimboel kombali ka moeka ajer, laloe merasa seperti ada orang djambak, ramboetnja; tapi di itoe waktoe djoega ija lantas loepa.

Tempo ija sedar kombali, ija ada di atas dek kapal, dan ija poen melihat pada toedjoeannja kapal itoe. Ija merasa senang di hati, oleh kerna kapal itoe boekan menoedjoe pada benteng d’If.

Sedeng ija rebah di atas dek, satoe matroos gosoki pada nja dengan kain panas. lain‘matroos kasih ija minoem sedikit anggoer, sedeng seorang toewa ijang djadi Kapitein atawa stuurman, memandang padanja dengan merasa kasihan.

Oleh kerna dibri minoem sedikit anggoer, sedeng antero badannja digosoki dengan kain panas, sigralah djoega Dantes itoe djadi segar kombali.

„Kaoe ini siapa?“ kata itoe Kapitein kapal dalem bahasa Fransch.

„Akoe ini,“ sahoet Dantes dengan bahasa Italie: „satoe matroos dari Maltha; kita-orang berlajar dari Sijracuse dengan praoe bermoewat anggoer. Itoe angin-riboet pada waktoe malem melanggar pada kita-orang di betoelan tandjoeng Morgiou, dan praoe kita djadi terpetjah, lantaran terdampar pada itoe karang ijang kalihatan djoega dari si sini.“

— „Kaoe soedah berenang dari mana?“

— „Dari itoe karang, di mana akoe soedah beroentoeng bisa naik, sedeng kita poenja Kapitein djadi mati, kerna terbanting oleh ombak pada karang itoe. Akoe poenja tiga teman ijang lain, mati kalelap. Akoe rasa, melinken akoe sendiri sadja ijang tinggal hidoep dari antarasSekalian kambratkoe. Akoe dapet lihat kapalmoe, dan dari sebab akoe koewatir nanti terpaksa tinggal lama di itoe poelo karang ijang soenji, akoe soedah tjoba berenang ka kapal ini dengan peloeki sepotong papan, ijang beratsal dari praoekoe. Akoe bersoekoer padamoe, kerna kaoe telah menoeloengi kahidoepankoe; akoe soedah moelai tenggelam pada waktoe seorang matroosmoe pegang ramboetkoe.“

„Akoelah ijang telah mengangkat kaoe,“ kata sajoe matroos ijang bermoeka manis: „soekoer kaboeroe djoega, kerna di itoe waktoe kaoe sedeng madjoe tenggelam.“

„Ja,“ kata poela Dantes : „betoel sekali, sobatkoe! kombali akoe bersoekoer kapadamoe.“

Hm!“ kata Kapitein: „akoe tida taoe, apa ijang haroes akoe berboewat dengan kaoe ini ijang pake djembros ampir sedada dan ramboet ampir saelo. Kaoe ini ada lebih mirip pada satoe begal dari pada mirip orang baik-baik.“

Di sitoelah baroe Dantes beringat, ijang selama ija tertoetoep di benteng d’if, ramboetnja atawa brewoknja tida sekali ditjoekoeri.

„Ja, ramboet dan djembroskoe ada pandjang.“ kata Dantes: „itoelah dari sebab akoe berkaoel di dalam bahaja besar bahoewa djika akoe slamat, akoe tiada nanti tjoekoeri ramboet atawa brewokkoe di dalem tempo sepoeloeh tohon. Betoel ini hari, temponja kaoelkoe itoe telah berlaloe habis.“

„Tapi apatah sekaran akoe misti berboewat dengan kaoe ini?"

„Kaoe boleh berboewat apa ijang kaoe soeka," sahoet Dantes: „Akoe poenja praoe telah terpetjah; akoe poenja Kapitein telah mati. Akoe sendiri terlepas dari binasa, tapi terlandjang boelat. Soekoerlah djoega akoe ini saorang pelajaran ijang pande; naikenlah akoe ini ka darat di palaboehan ijang paling doeloe kaoe hamperi: tiada soesah aken akoe dapet kerdjaan di kapal dagang."

Soedah berdiam sekoetika: Kapitein itoe berkata poela pada Dantes:

„Apa kaoe kenal baik sama Middellandsche Zee?" (♰)

„Sadari ketjil akoe biasa melajari laoetan,” sahoet Dantes.

„Kaoe kenal tempat-tempat ijang baik, aken berlaboeh di laoetan itoe?”

„Ampir di segala pelaboehan di laoet itoe, akoe bisa kandarken masoek dan kaloewar sembari meram.”

„He!” kata satoe matroos pada itoe Kapitein: „kaloe ini sobat ada bitjara dengen sebenernja, apa tida baik ija tinggal dan berkawan sama kita-orang?”

„Ja, tentoe baik sekali, saande ija poenja bitjara dengen sebenernja,” sahoet itoe Kapitein: „tapi didalem kasoesahan besar seringkali orang berdjandji banjak dengen sia-sia.”

(♰) Laoetan di antara Europa dan Afrika. „Akoe nanti berboewat lebih banjak dari papa ijang akoe berdjandji,” kata Dantes.

„Begitoe?” kata poela itoe Kapitein: „kaloe begitoe, biarlah kita tjoba lihat kapandeanmoe dipelajaran.”

„Soekoer sekali, Ka manatah kaoe ini ada menoedjoe?”

— „Ka Livorno!”

— „Akoe rasa, kaoe hilang banjak tempo dengen toeroeti alirannja ajer: mengapatah tida goenaken angin?”

— „Kaloe kita goenaken angin, kita nanti dateng di poelo Rion.”

— „Akoe rasa, boleh djoega kita djalan di samping poelo itoe; maski tida bisa berdjaoeh, boewat berenggang 20 depa tentoe boleh djoega.”

— „Pergilah sekarang kaoe pegang kamoedi, soepaja kita boleh lihat kapandeanmoe.”

Dantes lantas pergi pegang kamoedi, dan soeroeh matroos-matroos berboewat, apa ijang ija (Dantes) rasa perloe.

Di itoe waktoe djoega itoe kapal ijang berdjalan dengen perlahan, lantas berdjalan tjepat menjamperi poelo Rion, dan meliwat di samping poele itoe:

„Bagoes!” kata Kapitein.

„Bagoes!” kata sekalian matroos, sambil memandang dengen merasa heran pada Dantes, ijang ija-orang tida doega ada begitoe pande di dalem hal pelajaran.

„Angkaoe lihat,” kata Dantes: „bahoewa akoe ini boleh bergoena di dalem angkaoe poenja pelajaran ini. Kaloe angkaoe tida maoe akoe djadi temanmoe, angkaoe boleh tinggalken akoe di Livorno, dan dengen gadjikoe ijang akoe nanti dapetken di pelajaran ini, akoe nanti bajar harganja makanan ijang akoe makan di perdjalanan ini sampe di sana, djoega harganja itoe pakean, ijang sekarang akoe minta aken toetoep badankoe.“

„Baik!" kata Kapitein: „kita-orang boleh djadi teman, kaloe kaoe minta bajaran pantas.“

Sebegimana kaoe membajar pada teman ijang lain, begitoelah kaoe bajar padakoe.“

„Tida boleh begitoe," kata soewatoe matroos: „kerna kaoe ini ada lebih pande dari pada kita-orang.“

„Apatah kaoe perdoeli, Jacopo!“ kata Kapitein pada matroos itoe: „masing-masing orang poen boleh toeroet soekanja aken bekerdja dengen dapat bajaran ijang ija soeka. Dari bitjara tida karoewan, lebih baik kaoe pergi ambil satoe tjelana dan satoe jas boeat ini orang moeda ijang terlandjang boelat.“

„Akoe tida poenja jas, lain dari ijang akoe pake,“ kata Jacopo tapi akoe ada poenja satoe tjelana dan satoe kamedja, ijang akoe boleh kasih pindjam pada ini sobat baroe.“

„Barang itoelah ijang akoe perloe,“ kata Dantes. Jacopo lantas berlaloe, dan sigra djoega ija dateng kombali dengen bawa itoe pakean, ijang lantas djoega dipake oleh Dantes.

„Apa kaoe ingin dapet djoega lain barang?“ kata Kapitein pada Dantes.

„Ja“ sahoet Dantes: „akoe ingin sepotong roti dan sedikit dari itoe anggoer enak, ijang tadi akoe soedah tjoba: kerna akoe ada lapar sekali.“

Sigra djoega orang membri sepotong roti, dan Jacopo kasihken ija poenja satoe flesch anggoer pada Dantes.

„Gerakken kamoedi ka samping kiri!“ kata Kapitein pada orang ijang pegang kamoedi itoe.

Dantes menengok ka fihak itoe, sambil dekatken flesch anggoer pada moeloet sendiri; tapi sabelon flesch itoe sampe pada moeloetnja, Dantes lantas tertjenggang, selakoe orang ijang kaget.

„Lihatlah!“ kata Kapitein: „ada perkara apa itoe di benteng d'If?“

Lebih doeloe Kapitein itoe soedah lihat sédikit asep di benteng d'If, laloe mendenger boenji mariam. Sekalian matroos poen djadi kaget sedikit dan memandang satoe pada lain.

„Brangkali di malem tadi, ada seorang toetoepan ijang minggat,“ kata Dantes: „dan sekarang diboenjiken mariam di benteng itoe aken oetaraken itoe perkara, kerna memang di itoe benteng ada pake atoeran begitoe.“

Itoe Kapitein lantas memandang pada Edmond Dantes, ijang setelah habis berkata, lantas sadja moelai minoem; tapi Kapitein itoe lihat Dantes ada selakoe orang ijang senang, hingga kaloe ija (Kapitein) ada mendoega apa-apa, doegaannja itoe sigra djoega terhilang.

„Anggoer ini keras rasanja,“ kata Dantes, sambil mengoesoet keringat di djidatnja sendiri.

„Saande orang ini satoe pelari adanja,“ kata Kapitein di dalem hati, sambil memandang pada Dantes : „ada lebih baik lagi.”

Sehabisnja berkata ada’merasa tjape, lantas ija minta Dantes berdoedoek pegang kamoedi, dan permintadnnja itoe lantas djoega ditoeroet. Dengen berdoedoek Dantes memandang sadja ka pihak Marseille.

„Tanggal brapa sekarang?” kata Dantes pada Jacopo ijang dateng berdoedoek dekat padanja, sedeng kapal berlaloe semingkin djaoeh dari benteng d'If.

„Tanggal 20 Februari,“ sahoet Jacopo.

—„Tahon apa?“

—„Tahon apa?! kaoe tanjaken djoega tahon apa!?“

—„Ja, akoe tanja padamoe, sekarang ini ada tahon apa atawa tahon brapa.“

—„Apa kaoe loepa namanja tahon?“

—„Ja; di malem tadi akoe ada merasa amat kaget dan sangat takoet, hingga akoe ampir djadi gila dan ingatankoe djadi koesoet sekali. Akoe tida taoe, sekarang ini ada 28 Februari dari tahon apa.

—„Dari tahon 1829.“

Soedah berlaloe ampat belas tahon, sadari Dantes ditangkep. Pada tempo moelai ditoetoep, ija beroemoer 19 tahon, sekarang ini ija beroemoer 33 tahon.

Dantes bersenjoem sambil merasa doeka, ija menanja di dalem hati, apalah ijang telah djadi dengen Mercedes di dalem tempo itoe ijang begitoe lama.

Kemoedian matanja Dantes djadi beringas, kerna ija ingat pada itoe tiga orang, ijang telah djadi lantaran aken ija tertoetoep; kombali ija bersoempah, ijang ija nanti membalas sakit hatinja pada Danglars, Fernand dan Villefort.

---

{{pb|label=}