Anak Prampoean di Bikin sebagi Parit Mas - 03

Anak prampoean di bikin
sebagi parit mas
ATAWA
Iboe jang doerhaka
KA TIGA.

Pada waktoe sore sasoedanja abis mengadjar, ia lalocdoedoek didalem kamar sembari membatja boekoe-boekoectapi hatinja selaloe djadi terganggoe, kerna ia pikirin sadjacpada ketjintahannja jang ada di kota Betawi.

Saban Minggoe tentoe ia moesti dapet trima briefkaart dari si Boto, pada siapa koetika ia lagi maoe brangkat dari Betawi, ia soeda kasi itoe briefkaart-briefkaart dan soeda pesen djoega boeat kirim satoe briefkaart saban minggoeka ia poenja tempat tinggal baroe.

la anggep itoe briefkaart ada djadi satoe obat jang sanget moestadjab boeat semboeken ia poenja penjakit rindoe.

Kadang-kadang kaloe tante pos dateng satoe hari lebl taat dari waktoenja jang ia moesti trima itoe briefkaart, fa poenja hati telah djadi sanget kesel, kerna ia slempang jang barangkali ketjintahannja di kota Betawi ada dapet sakil atawa laen-laen hal jang mendjadi halangan, hingga si Boto tida bisa kirim itoe briefkaart.

Oewang gadjinja saban boelan ia koempoelin semoewa kerna ia ada dapet laen hasil dengen mengadjar orang orang di waktoe malem, dan saban boelan tentoe ia tida loepa boeat kirim oewang pada si Boto.

Lantaran si Boto tida kenal soerat, maka ada terlaloe soesa sekali boeat ia menjataken ketjintahan hatinja pada ia poenja toendangan, tapi ia masi blon poetoes akal boeat menjataken ia poenja pengrasahan hati; boeat bikin girang hatinja si Boto, ia soeda teeken diatas briefkaart roepanja satoe anak moeda dengen mesem menjioem satoe kembang jang itoe anak moeda lagi pegang. 1)

Saban waktoe menggerib, ia poenja hati jang tadinja ada girang telah beroba djadi berdeeka, sebab di itoe waktoe matahari ada linjap dari moeka boemi, dan mega-mega item poen ada liwat kasana-sini, begitoe poen dengen pikirannja Keng Hok soeda djadi terganggoe lantaran inget pada ketjintahannja.

Koetika ia soeda mengadjar liwat sepoeloe boelan, ada masoek satoe hakseng jang doeloe soeda perna taktje Hokkian dan ini moerid telah djadi hakseng jang paling pinter didalem itoe sekola, ia poenja kepandean poen ada sampe tjoekoep boeat pimpin sekalian temen-temen sekolanja.

Djika Keng Hok tida bisa mengadjar lantaran pri kewarasannja telah terganggoe, itoe hakseng ada gantiken mengadjar pada itoe moerid-moerid dalem itoe sekola.

Keng Hok ada sanget sajang pada itoe moerid dan soeka kasi ia pladjaran extra, soepaja itoe hakseng bisa djadi lekas pinter dan bisa bitjara Tjia-im dengen tetes.

Pada soewatoe hari, selagi Keng Hok doedoek memikirin ia poenja ketjintahan, sakoenjoeng-koenjoeng dateng satoe toekang post, jang seraken padanja satoe briefkaart.

——————

1)

Anak moeda memegang Kembang,
Kembang di pegang bewarna poeti,
Hatinja itoe mendjadi binghang,
Lantaran pikirin si djantoeng hati!

Keng Hok samboetin itoe briefkaart dengen hati jang girang, tapi koetika ia liat hoeroefnja di itoe briefkaart jang ada terloelis dengen tinta mera jang boenjinja seperti dimikian: „MINTA LEKAS DATENG !"

la merasa seperti boemi ambles dibawa kakinja, dan ia rasaken toeboenja ada sanget lemes, hingga ampir sadja ia djato pangsan.

Roepanja Keng Hok kita telah mendjadi poetjet, dan dengen hati jang bergontjang keras ia kerkata: "Hai ! kesian betoel si Boto, apatah soeda terdjadi di atas dirinja! Satoe machloeh jang lema misti menanggoeng sangsara, akoe misti toeloeng padanja, dan sekarang djoega kaloe bisa akoe maoe brangkat, soepaja akoe bisa toeloeng padanja dan kasi toendjoek akoe poenja ketjintahan hati jang besar! Tetapi apatah orang tida nanti tjela padakoe, djika akoe tinggalken itoe anak-anak moerid dengen setenga djalan? Han Swie (namanja itoe moerid jang paling pinter) bisa gantiken akoe poenja pakerdjahan, djika akoe tjoema verlof boeat satoe minggoe. Perkara menoeloeng orang ada lebi perloe dari pada perkara kasi pladjaran pada hakseng-hakseng, sekarang djoega akoe moesti brangkat, tapi ada terlaloe lama sekali kaloe akoe moesti djalan poeter ka Semarang, kaloe kebetoelan ada kapal jang maoe brangkat ini sore, akoe nanti membilang banjak trima kasi pada Allah !" kata Keng Hok didalem hatinja dan dengen mengoetjoer aer mata, dan laloe soeroe boedjang panggil pada si Han Swie.

Itoe hakseng jang denger goeroenja panggil, maka ia boeroe-boeroe dateng sembari menanja apa ia poenja goeroe hendak pesen.

Keng Hok lebi doeloe keringken ia poenja aer mata dengen satoe sapoe tangan, dan kemoedian ia berkata: „Swie, akoe minta kau poenja pertoeloengan boeat mengadjar pada semoewa hakseng-hakseng boeat lamanja satoe minggoe, sebab sekarang akoe hendak brangkat poelang. Liat ini briefkaart jang akoe baroesan trima dari Betawi, jang akoe di soeroe lekas balik ka Betawi !"

Han Swie lantes ambil itoe briefkaart dan meliat boeat semantara waktoe, kemoedian ia berkata: „Hakseng trima goeroe poenja prenta, masa hakseng brani engga djalanin kaloe goeroe ada oeroesan jang perloe, hakseng dengen segala senang hati soeka gantiken boeat mengadjar sekalian temen-temen."

„Ja! Trima kasi banjak dari kau poenja kebaekan, dan djika ada bestuur jang menanja, akoe harep kau soeka sampeken akoe poenja perkatahan jang akoe dengen menjesel moesti tinggalken ini roema sekola boeat balik ka Betawi tapi sebegitoe lekas itoe perkara soeda djadi selese akoe nanti balik kombali !"

Hatinja Keng Hok djadi merasa legahan, bahoewa itoe hakseng soeka gantiken ia poenja pakerdjahan, maka ia laloe brangkat ka kantoor kapal api boeat tjari taoe kapan ada kapal jang bakal brangkat dari Tegal ka Betawi.

Dasar ja blon maoe dapet kesangsarahan hati jang lebi besar, maka ia soeda dapet ketrangan, jang kebetoelan sebentar sore ada kapal jang maoe brangkat ka Betawi, hingga ia soeda djadi sanget girang sekali, dan lantes beli satoe kaartjis klas doea; sasoedanja ia laloe poelang lagi ka roema sekola boeat bikin beres semoewa barang-barangnja.

Hakseng-hakseng jang denger goeroenja hendak brangkat poelang ka Betawi, hatinja telah djadi sanget piloe sekali; dengen aer mata jang melele ia orang berkata pada goeroenja; „Senseh ini sekali poelang ka Betawi, hareplah senseh djangan loepa boeat balik kombali kesini!"

Keng Hok jang meliat moerid-moeridnja begitoe tjinta, ia poen merasa berat boeat berpisa dari itoe anak-anak sekola.

Ajahnja dari itoe semoewa hakseng-hakseng, jang dapet kabar bahoewa itoe goeroe hendak brangkat poelang ka Batawi, marika lantes anter barang-barang dan boeah-boeahan, boeat itoe goeroe jang boediman dahar didalem kapal.

Dengen stoom pergas jang djadi kepoenjaännja seorang Tionghoa hartawan pendoedoek di Tegal, Keng Hok di anter oleh brapa lid bestuur dari itoe roema sekola ka atas kapal.

Koetika kapal bersoeit boeat ka tiga kalinja, sekalian orang jang menganter pada Keng Hok lantas toeroen kombali ka marika poenja stoom pergas, dan itoe kapal lantes angkat djangkar, laloe moelai tinggalken plaboean Tegal.

Lid-lid berstuur jang ada didalem itoe stoom pergas membri slamat djalan pada itoe goeroe, dengen kasi tanda sama sapoe tangan jang ia orang kiber-kiberin.

Keng Hok poen ada membales itoe pembrian slamat.

Dengen sekedjapan sadja ia orang soeda berpisa djaoe, kerna djalannja kapal ada sanget tjepet, hingga pemandangan dari kota Tegal, lantes djadi linjap.

Boeat berdiri lebi lama diatas dek ia slempang, ia nanti djadi moenta lantaran mabok laoet, maka dengen sigra ia laloe rebaken ià poenja badan di atas pembaringan didalem kapal.

Tetapi lantaran ia blon biasa naek kapal, maka tida oeroeng ia soeda djadi moenta-moenta, dan ia rasaken kepalanja ada sanget berat.

Di itoe waktoe ia telah djadi inget perkara-perkara jang soeda kedjadian pada itoe waktoe, tatkala ia masi ada di Batawi, teroetama dari kebaekannja si Boto jang brangkali di dalem ini waktoe lagi mendapet kesoesahan besar. Kita poenja pena tiada bisa leekisken, begimana kesoesahannja hatinja itoe djedjaka moeda. „Apa telah terdjadi di atas dirinja si Boto" ia berkata di dalem dirinja sembari berpikir. Apatah brangkali si Boto soeda kesalahan kirim itoe briefkaart dengen tinta mera. Tetapi tiada bole djadi kerna ia soeda pesen itoe gadis dengen wanti-wanti.

la merasa slempang nanti djato sakit paja lantaran mabok lantaran mana ia nanti tida bisa menoeloeng dirinja ia poenja ketjintahan, begitoelah pikirannja ada tergoda teroes, hingga di itoe malem ia tida bisa poeles sama sekali. Lantaran itoe perlajaran antara Tegal dan Batavia tida sebrapa djaoe, maka itoe kapal bisa lekas sampe di Tandjong Priok.

Tatkala itoe kapal soeda ampir sampe di plaboean Batawi ia rasaken badannja telah djadi senang kombali sebagimana biasa, hingga hatinja djadi sanget girang.

Dengen boeroe-boeroe ia soeroe koeli angkat ka darat ia poenja barang-barang dan pergi ka station kreta api boeat pergi ka kota Betawi.

---

XII.
SEMOEA TELAH DJADI TJILAKA.

---

Boleh di bilang saban taon pada boelan Siegwee ada banjak sekali orang Tionghoa merajaken hari kawinnja ia orang poenja anak-anak. Begitoelah djoega di dalem itoe taon, pada waktoe mana itoe iboe doerhaka telah djoeal sala satoe ia poenja anak prampoean, jang masi gadis.

Di depan gedongnja dari saorang hartawan, ada berdiri tiga panggoeng; panggoeng jang sebla kanan ada di tempatken boeat toekang moesik; panggoeng tenga jang paling besar ada djadi panggoeng wajang Makauw, dan panggoeng jang sebla kiri ada tempatnja najoep. Lantaran di itoe hari, ada hari kawinnja itoe orang hartawan poenja anak lelaki hingga di itoe tempat telah djadi sanget rame

Tatkala kreta penganten jang di tarik oleh sapasang koeda besar brenti di depan itoe gedong, semoewa tetaboean lantes di kasi berboenji dengen rioe sekali.

Satoe boedjang sembari pegang pajoeng soelam penganten ada berdiri di deket pintoe kreta boeat pajoengin itoe sepasang merpati jang lagi maoe toeroen dari kreta kemanten.

Semantara propor lantes boeroe-boeroe boekain pintoe kreta.

Itoe Kemanten lelaki toeroen lebi doeloe dan berkiongtjoe pada penganten prampoean jang ada teranter dengen Emmah tjomblang.

Di depan pintoe gerbang dari itoe tetarep jang amat loeas, saorang prampoean toewa soeda menoenggoe datengnja itoe doewa penganten, prampoean toewa itoe ada pepang satoe piring jang terisi beras koening, kembang dan oewang cent, pitjis, dan wang talenan, jang telah di sebar di atas pajoeng penganten, koetika penganten lelaki dan prampoean toeroen dari kreta.

Anak-anak ketjil jang nonton itoe keramean, lantes bereboet itoe oewang, hingga ada bebrapa anak-anak jang telah djadi berklai satoe sama laen saling djotos.

Itoe doea penganten lantes masoek ka dalem pertengaän boeat djalanken peradatan Tionghoa dan makan doeablas mangkok.

Pat-im berboenji tida brentinja.

Selagi itoe doea penganten makan doeablas mangkok, kemanten lelaki laloe melirik pada kemanten prempoean lirikan mana soeda di samboet dengen satoe senjoem jang manis, hingga orang-orang prampoean jang dateng kondangan di itoe pesta telah dapet liat kelakoeannja itoe sepasang penganten; ia orang laloe berbisik satoe sama laen dengen berkata: „Do, si Tek mentang-mentang ia kawin sama anak Toa-lenja maka laganja seperti orang jang soeda kenal lama sadja !”

Ada lagi laen prampoean kata: „Wah! piaraäninja, jang denger babanja kawin tentoe lagi menangis engga brentinja !”

„Ija kenapa dia boleh bisa djadi terlepas, sedeng dia begitoe di ljinta, oleh si Tek !” kata satoe tetamoe prampoean laen.

„Toewatji engga taoe si,” tjeritanja tempo Emmahnia adjak ia melantjong ka tanah Toa-lenja di Cheribon, si Tek ada dapet sakit, keras, dan soeda dirawatin oleh iloe nona penganten. Disana dia tinggal sampe satoe boelan, maka itoe dia djato tjinta pada dia poenja soedara piauw dan bisa loepaken dia poenja piarahan; sahoet laen tetamoe, Jang kenal baek pada iboenja itoe kemanten lelaki.

Sahabisnja menika tiga hari, itoe doea penganten soeda brangkat poelang ka roemah orang toewanja penganten prampoean di Cheribon, dan si Ros soeda di tinggalken oleh Babanja beeat selama-lamanja.

Lantaran istrinja ada begitoe tjinta, maka si Tek soeda tida inget lagi pada ia poenja piarahan, hingga si Ros jang djadi teroembang-ambing ka sana-sini, dan blakangan soeda djadi boenga raja jang kita nanti toetoerken di blakangan.

Sekarang kita adjak pembatja meliat pada Baron Lim jang tinggal di Petekoan; itoe Baron lantaran selaloe di ganggoe tjengkauw-jengkauw jang dateng menagi barang-barangnja jarg Entjim Asie ambil boeat pindjem liat, soeda mendjadi sanget moerka pada itoe prampoewan pementopan jang soeda di boesoekin namanja dengen djeblosin barang-barangnja itoe tjengkauw-tjengkauw ka pengadean.

Lantaran bentji pada Entjim Asie itoe Baron soeda tida maoe dateng-dateng ka roemanja ia poenja djingé. Si Manis satoe prampoean jang begitoe moeda dan baroe merasaken itoe kesenangan doenia boeat bebrapa boelan sadja, sekarang soeda di tinggalken oleh ia poenja Baba dengen mendadak, hingga ia soeda djadi kelabakan seperti ikan tiada dapet aer.

Maski ia ada berdoeka tentang keilangan Babanja, tetapi lantaran ia poenja hati jang sedeng birahi soeda membikin ia tiada loepa aken berias saban hari. Boleh di bilang saban waktoe orang bisa liat si Manis poenja pakean sanget perlente. la tjoekoerin ia poenja moeka begitoe rapi, hingga tiada keliatan ada selembar boeloe kalong dan poles. moekanja dengen poepoer tebel tebel, hingga kliatannja amat medok; poen koendenja ada amat lijin. (Barangkali kaloe ada laler jang mentjlok di ramboetnja tentoe itoe laler moesti terpleset dan djatokebawa).

Saban waktoe orang bisa liat djoega moekanja itoe Nona moeda, jang lagi nongkrong di depan pintoe dengen roepa jang kesel, tetapi matanja menengok dengen lirikan jang sarabat serebet ka sana sini, seperti apinja satoe Light house (roema jang di berdiriken di pinggir laoet dengen di taroken penerangan, jang apinja sebentar idoep, sebentar mati, soepaja kapal djalan di itoe laoeatan tida djadi kesasar !”)

„Hai! Bi! kenapa Baba engga taoe dateng, apa dia mara sama saja ?” tanja si Manis pada boedjang prampoeannja itoe Baron jang tinggal di itoe roema djoega.

„Ija! tapi Nona djangan terlaloe kesel, boleh djadi Baba lagi engga sempet, engga lama djoega dia misti dateng, masa dia tega tinggalken Nona setenga djalan !” kata itoe boedjang jang maoe hiboerin hatinja itoe Nona moeda.

„Itoe malem selagi dia maoe berdjalan poelang, dia tjioem saja berkali-kali, masalah bolehnja sekarang dia engga moentjoel-moentjoel. Barangkali dia oeda bosen sama saja ?” kata si Manis dengen hati jang mengenes sekali, kerna di itoe waktoe ia lagi sedeng pikirin bagimana nanti djadinja ia poenja diri.

„Barangkali Baba soeda piara orang lagi, Bi ?”

„Engga Na! kaloe dia piara orang lagi, tentoe dia kasi taoe saja!”

Selagi itoe bini moeda beromong sama boedjangnja, sekoenjoeng-koenjoeng di itoe Gang ada liwat satoe anak moeda jang tjakap serta berpakean netjis.

Matanja itoe alap-alap ada mengawasin sadja pada si Manis, seperti kelakoeannja satoe koetjing maling jang lagi lapar baroe mendapet liat daging di atas dapoer.

Si Manis poen koetika meliat jang itoe anak moeda ada mengawasin dia dengen begitoe matjem, hatinja djadi tergerak sedikit dan merasa girang jang ada laen anak moeda tergila-gila padanja, maka ia lantes bales melirik pada itoe Siauwlianke.

Sebagi mega jang mendoeng ketioep angin keras, telah linjap bagitoe lekas begitoe djoega roepanja jang doeka dari itoe Nona moeda dengen sekoenjoeng koenjoeng soeda djadi girang kombali. Maka ia laloe beromong-omong sama itoe boedjang dengen moeka jang terang, kerna hatinja ada djadi sanget girang, dan pembitjarahan itoe ada di sertaken senjoem-senjoem jang manis, sedeng ia poenja mata mengawasin troes pada iloe anak moeda, hingga membikin itoe alap-alap djadi semingkin bengal dan berdjalan moendar-mandir di itoe gang sebagi orang ada poenja kaperloean.

Siapatah orang moeda itoe jang begitoe bisa menarik hatinja si Manis ? Ini tentoe pembatja maoe taoe terang, siapa adanja ini alap-alap ?

Anak moeda itoe ada seh Sie nama Teck Long; sedari ia moelai brangkat besar, ia soeda tida soeka bladjar, tapi ia ada sanget soeka bladjar krontjong dan bladjar njanji lagoe-lagoe jang merdoe, dan bertjampoeran sama temen-temen jang soeka plesir di soehian-soehian.

Teck Long ini boekan sadja roepanja ada tjakap, tetapi ia ada pande sekali boeat kongkoin prampoean-prampoean dengen pembitjaraän lemah lemboet hingga prampoean jang bagimana angkoe djoega poen kaloe deket padanja tentoe moesti djato hati. Djika ia mengomong sama orang, ia selaloe merendaken dirinja djangan sentara orang prampoean, orang lelaki poen jang deket padanja, tentoe djadi merasa soeka boeat bergaoelan teroes sama ini toekang adoe lida.

Kaloe ada satoe prampoean jang ia maoe dapetken, dan ia dapet kenjatahan jang itoe prampoean tida maoe ladenin padanja, ia lantes garoek krontjongnja, di dalem mana ada di taroken goena-goena jang ia bole dapet dari satoe doekoen di Bantam, jang banjak orang soeda poedji dari ia poenja goena-goena jang sanget mandjoer, dan sembari menjanji lagoe-lagoe jang merdoe ia nanti liwat di roemanja itoe prampoean di waktoe malem.

Maski orang prampoean baek-baek jang masi Gadis kaloe denger itoe toekang pelet lagi maen Krontjong, sembari menjanji pantoen-pantoenan dengen tekoekan soewara jang aloes, tentoe nanti boeka pintoe boeat mengintip aken meliat siapa itoe orangnja, jang begitoe bisa menarik orang poenja hati.

Ini alap-alap tida maoe berkerdja, kerna ia takoet tjape boeat mentjari wang jang halal :maski ia tida ada poenja perkerdjahan ia berpake amat netjis, kala dengen pakeannja orang-orang jang djadi klerk di kantor jang makan gadji ratoesan, kerna ia selaloe bikin pakean pada toko Europa. la pake badjoe djas linnen, topi vilt Borsalino, Kantjing mas, rante horlogie mas melintang dan sepatoe boetin. la ada pake tjinjin di tangan kere kanan di djeridji manis, soepaja ia poenja roepa bisa lebi menarik di dalem pemandangannja orang prampoean.

Ha! kita teroesa tjeritaken lebi pandjang lagi, tentoe pembatja taoe sendiri, bagimana satoe pengeret riasken dirinja, soepaja orang-orang prampoean jang liat bisa djadi tergila-gila padanja dan lantaran itoe membikin gampang di eret barangnja.

Maka tida poen heran jang si Manis kendatipoen baroe ini sekali meliat roepanja itoe alap-alap lantes hatinja djadi ketarik, dan merasa soeka pada itoe pengeret.

„Bi, kenapa itoe Baba ngawasin ka sini sadja ?” tanja si Manis pada boedjangnja.

Itoe boedjang lantes menengok keloear dan dapet kenalin, siapa adanja itoe anak moeda, maka ia laloe mendjawab: „O! Itoe ada Baba saia, doeloe bekas madjikan saia!”

„Siapa namanja ?”

„Baba Teok Long!”

Itoe alap-alap jang lagi djalan boelak balik di itoe Gang dengen tingka lakoe seperti satoe Wijkmeester jang lagi maoe tjari orang, koetika dapet liat jang boedjangnja itoe nona moeda doeloe ada bekas ia poenja boedjang, hatinja lantas djadi sanget girang dan lantas dapet harepan besar.

Lantaran ia soeda biasa dengen pakerdjahan kongkoin prampoean, maka ia tida merasa kikoek-kikoek lagi, dan lantes menanja pada bekas boedjangnja dengen berkata:” Bi, loe kerdja disini ?”

„Saia Ba, Baba maoe kemana ?” tanja itoe boedjang.

„Goea maoe tjari temen goea, si Han Soei apa loe kenal ?” kata itoe alap-alap jang matanja ada mengngintjer sadja pada orang poenja bini moeda, kelakoean mana ada mirip sekali seperti satoe boeroeng oeloeng-oeloeng jang lagi maoe samber anak ajem.

„Saia engga kenal itoe nama Ba, disitoe ada orang jang baroe pinda tjoba Baba tanja adja !” kata itoe boedjang sembari menoendjoek satoe roema di oedjoeng Gang Tjaiho.

„Ajo ah, loe anterin goea doeloe, goea maloe si tanja orang jang goea engga kenal ?” kata itoe pengeret jang sebetoelnja, ia poenja omongan ada bertja bang doea.

„Nanti doeloe Ba, saia minta permisie doeloe sama Nona!” kata itoe boedjang jang laloe lari masoek ka pertengaän.

Koetika itoe alap-alap dateng mamperin itoe boedjang, si Manis lantes lari masoek dan doedoek di satoe krosi gojang jang ada di pertengaän depan, tapi matanja selaloe ada mengawasin ka depan sadja.

„Na, saia maoe ka sitoe doeloe, ja !” kata itoe boedjang pada nonanja kedip kedipin matanja.

„Loe pergi djangan lama-lama !” kata si Manis sembari mesem-mesem.

Itoe boedjang lantes pergi keloear dan berdjalan sama itoe boeaja krontjong.

Koetika ia orang soeda berada sedikit djaoe dari roemanja si Manis, itoe alap-alap lantes berkata: „ITOE NONA SIAPA ?”

„Madjikan saia, Ba, bini moedanja Baron Lim !” menjaoet itoe boedjang jang djoega sering djadi kontjonja boeat djalanin perboeatan kedji.

„Siapa namanja?”

„Nona Manis !”

„Apa Babanja saban hari dateng disitoe?”

„Doeloean si betoel, tetapi sekarang setace apa lantarannja dia engga dateng-dateng!”

„Kaloe dia dateng, apa dia soeka nginep?”

„Datengnja si bole di tentoein, saban pagi djem sepoeloe, sore djem tiga dia poelang ka roemanja!”

„Loe kira goea bisa dapet engga ?” „Kaloe saja liat si roepanja Nona, tentoe Baba bisa dapet, asal adja Baba maoe kasi saja persen, jang besar tentoe saja nanti bantoe omongin !

„Koerang adjar, engga laen doeit adja jang loe maoe, nah, goea kasi loe satoe roepia doeloe, tetapi goea maoe dapet kabar sebentar malem djem delapan goea toenggoe di gardoe Pasar Glap, djangan loepa ja!“ kata itoe alap-alap jang laloe kasi keloear satoe roepia kasi pada itoe boedjang.

„Baek Ba, nah ni roema itoe orang jang baroe pinda, nanti saja tanja, ja?“

„Eh! eh! apa loe engga taoe goea poenja akal, kan goea tjoema berlaga adja, boeat tjari orang; sebetoelnja goea maoe adjak omong sama loe!“

„Baba tengkoelak, saia djoega tengkoetjia, masa saja engga taoe Baba poenja akal!“ kata itoe boedjang dengen tertawa.

„Nah! oeda begitoe adja, ja,“ kata itoe alap alap jang laloe brangkat pergi ka Tongkangan dan kemoedian poelang ka roemanja boeat menoenggoe kabar sabentar malem di gardoe Pasar Glap.

Itoe boedjang lantas poelang dengen moeka mesem-mesem, sembari awasin roepanja ia poenja Nona.

„Kenapa loe mesem-mesem si, kaja orang gila?“ tanja si Manis jang merasa sedikit tjemboeroean.

„Engga Na, toe Baba dia bohongin saja maoe tjari orang, padahal dia maoe tanja Nona!“

„Dia tanja apa?“

„Dia tanja Nona apa ada poenja Baba atawa tida?“

„Abis loe kata apa?“

„Saja kata ada!“ kata itoe boedjang, jang pande sekali boeat djakdjakin orang poenja hati!

„Ach! kenapa loe kata ada?“ kata si Manis dengen roepa jang seperti orang menjesel. „Abis saja misti bilang apa?“

„Kata engga, kan dia nanti maoe sering-sering liwat lagi kemari!“

„Apa Nona soeka sama toe Baba?“

Si Manis tinggal diam sadja, lantaran ia merasa maloe dan takoet djoega jang itoe boedjang nanti moeloetnja botjor dan kasi taoe pada Baron Lim.

„Na, kaloe Nona maoe soeroe toe Baba dateng, ini gampang sekali, saja nanti panggil padanja!“

„Ach! nanti loe poenja moeloet botjor!“

„Na, tempajan kaloe di soempel lobangnja masa bisa djadi botjor, begitoe djoega saja, kaloe Nona kasi oewang kopi masa saja bilangin pada Baba Baron!“

„lja kenapa goea liat roepanja minis befoel, blon ada satoe lelaki jang bisa bikin goea poenja hati djadi bergerak sepertig oea liat roepanja itoe Baba, apa lagi lenggangnja kaja Neneh Tjiong!“

„Saja djoega kaloe masi moeda, kaloe saja engga dapetken iloe Baba, saja penasaran. Tempo saja kerdja di roemanja, banjak anak-anak prawan jang gilain padanja!“

„Bisa adja ini Bibi!“

„Itoe Baba djoega ada tjinta pada Nona, sebentar malem dia maoe dateng kamari!“

„Dia maoe tjari siapa?“

„Tjari siapa lagi, tentoe djoega dia maoe tjari Nona jang dia tjinta!“

Ach! goea takoetlah, nanti Baba Lim dapet taoe boleh boleh goea djadi tjilaka!“

„Djangan slempang, Na, kaloe ada saja, tentoe engga ada jang dapet taoe Nona poenja resia!“

„Abis dia maoe apa dateng kemari?“

„Maoe apa lagi si, masa Nona engga taoe?“ Si Manis lantaran masi blon biasa berdjalan serong, maka ia masi merasa maloe-maloe boeat njataken pikirannja dengen teroes terang, maka ia berdiam sadja, tiada maoe berkata satoe apa.

„Sebentar malem Nona djangan tidoer siang-siang ja, kaloe tetangga tetangga soeda pada masoek tidoer, nanti saja adjak itoe Baba dateng kamari!“

„Masa bodo loe, goea si maloe, nanti orang kata prampoean gila laki!“

„Maloe apa si, masa orang taoe;“

„Kaloe kepergokan, goea nanti kasi taoe Baba, jang dia ada kendakloe!“

„Boleh Na, asal Baba Baron maoe pertjaja adja, boeat saja si roegi apa, malahan saja oentoeng, kaloe Nona maoe kasi itoe Baba pada saja.

Si Manis tida berkata kata lagi, hanja laloe ambil pendjaitan, djait ia poenja badjoe jang ia baroe bli, sekedar boeat liwatken temponja jang menganggoer.

Koetika lotjeng mengoentaraken djem anam sore, itoe bini moeda jang maoe berdjalan serong, lantes sadja pergi mandi dan kemoedian ia laloe berias dengen rapi, dan berkoende dengen litjin, itoe badjoe jang baroe abis di djait, ia lantas pake, soepaja roepanja boleh djadi lebi eilok di peman- dangannja itoe Baba jang baroe.

Kamarnja poen soeda di oekoep dan di atas pembaringan ia sebarken kembang-kembang jang haroem baoenja, serta di atas bantal kepala ia ketjrot ketjrotin aer wangi, soepaja orang jang berbaring bisa dapet tjioem itoe baoe jang haroem.

Sasoedanja bersantap malem, si Manis laloe doedoek di pertengaan sebla depan, sembari mama siri ia berpikir, bagimana ia moesti berlakoe boeat trima itoe Baba baroe. la merasa maloe dan likat boeat lakoeken itoe perboeatan kedji, dan hatinja poen merasa takoet, bahoewa Baba Baron nanti dapet taoe, tetapi itoe semoewa pengrasaän soeda di tolak dengen ia poenja napsoe birahi jang sanget besar.

Maskipoen begitoe, tetapi pikirannja di itoe waktoe masi moendoer madjoe tida tentoe, dan achir-achirnja ia telah ambil poetoesan aken berpoera-poera seperti dapet sakit kepala dan tidoer di pembaringan aken menoenggoe datengnja itoe........ maka dengen sigra ia laloe berkata pada boedjangnja: „Bi, sebentar kaloe toe Baba dateng soeroe dia masoek adja! Goea poenja kepala bolehnja djadi poesing, goea sekarang maoe reba-rebahan di kamar!“

„Baek Na!“ kata itoe boedjang prampoean alias Emmah Peropot, sembari mesem sedikit, kerna ia dapet tebak maksoednja ia poenja madjikan.

Setelah lotjeng mengoentaraken djem sepoeloe malem, keadaan di itoe gang lantes moelai djadi soenji; roema-roema jang berdamping deket roema si Manis, semoewa soeda pada toetoep pintoe, dan djarang sekali ada orang jang liwat di itoe gang, kerna ini soeda sampe waktoenja boeat semoewa machloek aken mengaso dari marika poenja pekerdjahan.

„Toeng! Toeng! Toeng!“ Begitoelah Tongtong berboenji sepoeloe kali, boeat kasi taoe pada sekalian pendoedoek Pasar Glap, jang di itoe waktoe soeda djem sepoeloe malem.

Itoe boedjang tjilaka lantes boeka pintoe pergi ka itoe gardoe, aken ketemoeken itoe alap-alap.

Tatkala ia sampe di tempat jang di toedjoeken, ia laloe gapein itoe alap-alap jang lagi doedoek menoenggoe sembari mengobrol ka barat ka timoer, sama toekang gardoe.

„Bagimana? Apa kabar baek!“ tanja itoe alap-alap pada kontjonja, sembari berbisik. „Djangan tanja lagi, Ba, kaloe saja jang boedjoek tentoe tida gagalnja!“

„Apa sekarang goea boleh ka sana?“

„Boleh Ba, tetapi Baba moesti djalan- plahan-plahan, soepaja tetangga engga dapet denger soewara tindaknja Baba poenja sepatoe”.

Dengen girang Teck Long lantas ikoet itoe boedjang ka Gang Tjaijho, dan dengen mata jang seperti maling, ia menengok ka sana-sini, dan sasoedanja ia dapet kenjatahan, bahoewa tida ada orang nanti bisa dapet liat, jang ia ada masoek ka itoe roema, kemoedian dengen djalan berindap-indap baroe ia masoek ka dalem dengen di ikoetin dari blakang oleh itoe boedjang doerhaka.

„Mana Nona loe?” tanja itoe alap-alap jang soeda tida sabar lagi boeat menoenggoe lebi lama, koetika ia dapet kenjatahan, bahoewa korbannja tida ada di sitoe.

„His! His! His! kaloe ngomong plahan-plahan sedikitlah, nanti kaloe ada orang mengintip kan nanti dia dapet denger!” kata itoe pedjadjaran jang laloe koentji pintoe depan dengen plahan.

„Mana dianja si?”

„Nona lagi tidoer-tidoeran di randjang, katanja dia poenja kapala sakit, saja kira si, dia berlaga adja!”

„Apa dia soeka trima goea dateng kamari?”

„Kaloe dia engga soeka, masalah saja brani-branian adjak Baba kamari!”

„Apa kamarnja dia koentji engga?”

„Engga Baba masoek adja da!”

Hatinja itoe alap-alap djadi sanget girang, bahoewa begitoe gampang ia bisa dapetken keinginannja, maka dengen sigra ia laloe masoek ka dalem itoe kamar.

„Wah! haroem betoel baoenja ini kamar!” kata itoe alap-alap, sembari bentet-bentet orang poenja klamboe.

Setelah si Manis dapet denger itoe tindakan orang masoek ka kamarnja, ia lantes dapet doegahan, bahoewa orang jang masoek itoe adalah itoe Baba jang tjakap, jang tadi siang. ia soeda liat jang lenggangnja kaja neneh Tjiong; tapi ia masi tinggal meremken matanja dan berpoera-poera seperti orang jang lagi sedeng tidoer poeles.

„Nona! kenapa begini waktoe Nona soeda tidoer!” kata itoe alap-alap, sembari gojang-gojang badannja si Manis dengen plahan.

Si Manis lantes berlakoe seperti orang jang baroe mendoesin dan dengen roepa seperti orang jang kaget, ia lantes bangoen dari pembaringan, seraja berkata,Eh! Engko!”

Sahabisnja oetjapken ini perkatahan, ia laloe toendoekkin kepalanja lagi seperti orang jang masi merasa maloe.

„Nona, apa Nona poenja Baba engga taoe dateng malem?” tanja itoe alap-alap, sembari deketin si Manis.

„Engga Koh!”

„Wah! kesian betoel, tadi tempo saja liat Nona tidoer sendirian sampe saja poenja hati merasa antjoer, sebab satoe prampoean jang tjantik dan moeda kaja Nona, sepatoetnja engga ada orang lelaki jang nanti bisa berpisa dari dampingnja itoe Nona!" kata poelah si Teck Long jang maoe bikin renggang ketjintahannja si Manis pada ia poenja Baba sedjati.

„Abis saja djadi bini moedanja si, dimana dia bisa menginep disini!” menjaoet si Manis dengen roepa sedikit maloe.

„Nona ada poenja pikiran begitoe si baek djoega, tjoema sadja kaloe nona manda sadja di rongrong djadi sajang-sajang Nona poenja diri jang masi begitoe moeda. Kenapa-an si Nona bersetia padanja, sedeng dia engga kesian pada Nona, kaloe dia engga dateng, nanti 'ngko jang ganti-in menginep disini, kan djadi Nona engga merasa kesepian!” kata poelah itoe alap alap dengen tjengar-tjengir.

„Engko poenja omongan si betoel djoega, sedari saia kawin, saja blon merasa dapet tjoekoep kesenangan dari saia poenja Baba, sebab dia ada poenja bini lagi si!”

„Maskipoen di toemploekin oewang djoega, tentoe Nona masi blon merasa senang, kaloe Nona misti tidoer sendirian!

„Doeloean si lagi baroe-baroe dia piara saja, boleh di bilang saban hari tentoe dia dateng kamari, tetapi sekarang soeda satoe boelan dia engga taoe dateng, barangkali dia ada piara prampoean lagi?”

„Wah! Nona engga taoe adja, piaraännja di loearan ada doea tiga jang Engko taoe, setaoe brapa banjak lagi prampoean jang di piara jang 'ngko engga dapet taoe!”

„Siapa-siapa namanja Ko, dan dimana tempat tinggalnja?”

„Si Eng di taro di Blandongan, si Tji dia sewain roema di Tiang Bendera, dan Njai Ona, doeloe bekas najoep di kasi tinggal di Klenteng di petaknja sendiri!" Wah kaloe maoe di padoe kebagoesannja sama Nona, seperti langit sama boemi, pendekuja Nona poenja roepa ada lebi bagoes seratoes kali!”

„Ko si bisa adja alem orang!” kata si manis dengen moeka girang.

Meliat tingka lakoenja itoe Nona moeda, si alap-alap djadi dapet harepan besar, kerna ia poenja lida jang tadjem soeda bisa menarik keras sekali hatinja itoe bini moeda jang koerang pikir; apa lagi di itoe waktoe ja soeda djadi bernapsoe betoel pada itoe machloek jang eilok, hingga ia soeda tida maoe menoenggoe lebi lama lagi boeat dapetken dirinja itoe nona moeda, maka ia lantes boeka pakean leearnja dan gantoeng dimana pakoe jang ada di pantek diatas tembok; kemoedian ia laloe samperin itoe nona manis, seraja berkata: ,,Nona, darian kita ngomong sembari doedoek, kan lebi baek kita tidoer-tidoeran!"

Sahabisnja oetjapken ini perkatahan si alap-alap lantes pelok orang poenja leher dan tjioemin pipinja si Manis; itoe prampoean moeda jang koerang pikir poen bales menjioem, perboeatan mana soeda membikin timboel ia orang poenja birahi dan ingin djoega Hantes menjataken masing-masing poenja ketjintahan.

Seblonnja ia orang bisa lakoeken itoe perboeatan kedji, sakoenjoeng-koenjoeng terdenger ada orang ketok pintoe depan.

,,Siapa ?" tanja itoe boedjang jang lagi tidoer di pertengaän.

,,Goea Bi!" mendjawab itoe orang jang ketok pintoe.

,,Itoe boedjang prampoean ada kenalin betoel jang itoe penjaoetan ada soewaranja ia poenja madjikan, hingga ia poenja hati djadi berdebar-debar, tetapi lantaran ia sering ketemoeken ini perkara jang soeker, maka ia tida djadi bingoeng dan poetoes akal.

,,Tooenggoe doeloe Ba, koentji pintoe depan nona jang pegang nanti saja ambil doeloe !" kata itoe boedjang prampoean jang lantes lari masoek ka dalem kamarnja si Manis.

Itoe doea menoesia kedji poen jang ada didalem kamar, soeda dapet denger jang Baron Lim ada di loear, hingga marika djadi sanget ketakoetan dan tida dapet akal boeat lolosken dirinja, soepaja itoe Baron tida dapet taoe jang didalem itoe roema ada disimpen orang lelaki.

Moekanja itoe alap-alap soeda djadi sanget poetjet, dan dengen bawa ia poenja badjoe djas dan kasoet slop ia lari ka sana-sini. seperti tikoes jang lagi di kepoeng maoe mentjari lobang !

,,Eh! kenapa Baba djadi begitoe bingoeng?" kata itoe boedjang dengen tertawa jang di tahan, koetika melial itoe anak moeda lagi kebingoengan. ,,Abis dimana goea misti semoeni ?" tanja Itoe alap-alap dengen poetoes harepan boeat lolosken dirinja.

,,Semoeni adja di karkoes, tentoe Baba Baron engga taoe?" kata poelah itoe boedjang dengen mesem-mesem.

,,Ach! goea engga maoe, baoe si !" djawab itoe alap-alap dengen berengoet.

,,Apa baekan ketaoean dari pada Baba tahan sedikit baoe !"

,,lja da, apa boleh boeat, goea toeroet djoega!" kata itoe alap-alap jang dengen toetoep moeloetnja sama sapoe tangan, laloe masoek didalem itoe kamar No. 100.

Si Manis koetika meliat jang ketjintahannja soeda semboeni, lantes pergi keloear boekain pintoe, tapi dari trangnja remboelan orang bisa dapet liat roepanja itoe Nona moeda ada sanget poetjet.

,,Hai! saja kirain siapa ke jang dateng tenga malem ketok pintoe, sampe saja djadi ketakoetan, kiranja ada rampok !" kata itoe bini moeda, setelah ketemoe pada Babanja.

,,Goea abis nonton bangsawan di Kongsi Besar, maka goea dateng begini waktoe!" kata Baron Lim.

,,Kenapa Baba engga taoe dateng dateng si, saja kira Baba mara sama saja, tapi saja heran sekali lantaran saja engga merasa soeda bikin sala pada Baba !"

,,Goea engga sempet si !" kata itoe Baron jang laloe pimpin tangannja ia poenja bini moeda adjak masoek ka dalem kamar, dan laloe boeka pakeannja, sasoedanja ia rebaken dirinja di atas pembaringan.

„Kaloe saja kata tentoe Baba koerang pertjaia, sedari Baba engga taoe dateng kemari, saja engga enak tidoer dan tida napsoe makan !" kata si Manis, sembari toeroet baringken badannja di itoe randjang.

„Sampe begitoe loe tjinta sama goea?" kata itoe Baron jang soeda kena di lagoeken oleh itoe omongan jang manis, hingga ia laloe memelok toeboenja ia poenja bini moeda.

,,Tjoba Baba pegang badan saja soeda koeroesan banjak !"

,,Masa?" kata itoe Baron jang laloe raba-raba badannja itoe Nona manis dan kemoedian ia tjoebit pahanja itoe djinge.

,,Adoe! sakit kan toe Ba, djangan begitoe dong, kaloe tjinta pada saja !" kata poeia si Manis dengen mesem-mesem. Baroe goea pegang begitoe sadja loe soeda merasa sakit, loe soeka berlaga sadja !"

,,Tjobalah Baba poenja badan saja tjoebit apa sakit apa engga?"

,,Na ni goea kasi loe tjoebit!"

Si Manis laloe tjoebit pahanja ia poenja Baba, hingga itoe Baron djadi bertreak lantaran kesakitan.

„Eh! loe maen-maen gila ni, kan sakit loe tjoebit paha goea begitoe kras?"

,,Na taoe ko sakit, kenapa Baba tadi tjoebit saja, apa engga sakit djoega ?"

,,Ach oedalah, seri da, sekarang loe djangan tjoebit-tjoebit goea lagi", kata itoe Baron, jang laloe memelok lebi keras.

,,Na begitoe dong, kan baroe namanja orang tjinta!" kata si Manis, sembari tjioem pipinja itoe Baron.

,,Goea kangen betoel sama loe, soeda satoe boelan si goea engga dateng!"

,,Apa lagi saja, saban malem tinggal saja pelokin bantal goeling sadja!"

,,Ha! Ha! Ha! itoe toch soeda sampe tjoekoep !"

,,Memang djoega sampe tjoekoep senang, tetapi Baba saban malem tidoer sama baba poenja bini moeda baroe enak, ja !"

,,Mana goea ada poenja bini moeda lagi, selaennja loe !"

,,Di antara orang-orang kaja, tjoema Baba jang paling hookia, sebab Baba tjoema piara tiga bini moeda sil"

,,Siapa jang kata ?" ,,Hm! apa saja engga taoe, saja soeda dapet taoe, dimana tempatnja Baba taro itoe semoewa goela-goela !"

,,Ach oeda lah loe djangan ngomong begitoe, bikin koerang pertjintahan kita!"

Sahabisnja oetjapken ini perkatahan, itoe Baron lantes toebroek. . . . . . . . . . . . .

Sementara itoe doea kekasih lagi senang plesir dengen naek ,,kapal oedara" terbang tinggi di atas kajangan, tinggal itoe alap alap jang semboeni di karkoes moesti tahan baoe jang boesoek! (Kesian !)

Permoela kali itoe alap-alap merasa sanget mendongkol pada si Manis dan itoe Baron, tapi achir-achirnja itoe amarah soeda djadi linjap sendiri, kerna ia pikir itoe prampoean, jang la maoe dapetken ada piarahannja itoe Baron, maka itoe ia djadi tida ada hak aken melarang itoe prampoean plesir dengen Babanja.

Satoe djem telah berselang, itoe Baron soeda keloear dari itoe kamar aken brangkat poelang ka roemanja di Patekoan.

,,Kenapa Baba maoe poelang begitoe terboeroe boeroe si, nginep sadja disini mentak kenapa si ?" kata si Manis dengen bikin roepanja seperti orang jang kesel lantaran merasa brat boeat berpisa pada Babanja, padahal, didalem hatinja kepengen, soepaja Babanja bisa lekas-lekas poelang.

,,Kaloe goea nginep, tentoe besok pagi goea nanti berklai sama bini goea!" kata itoe Baron, sembari boeka dompetnja kasi kloear sepoeloe lembar oewang kertas dari f 10 - kemoedian ia berkata lagi: "Ni loe poenja oewang blandja nona Manis!"

,,Mari dong kasi saja tjioem doeloe, kaloe Baba maoe poelang djoega!" kata si Manis jang laloe samboetken itee oewang dengen hati jang girang dan laloe menjloem pipinja itoe Baron bebrapa kali. Sampe disini kita djadi inget pada satoe pepala Inggris jang boenjinja seperti demikian : ,,A KISS OF THE MOUTH OFTEN DOES NOT TOUCH THE HEART" djika di salin didalem bahasa Melajoe maksoednja kira-kira seperti brikoet: „Satoe tjieeman jang manis seringkali ada di lakoeken dengen hati jang tida djoedjoer!"

Ini pribahasa ada satoe nasehat bagi anak-anak moeda, soepaja marika djangan gampang pertjaia pada prampoean, djalang, apabila itoe prampoean toendjoekin ketjintahannja dengen menjioem dan sebaginja, kerna itoe tjoema ada satoe akal boesoek, maka ada banjak orang lelaki jang soeda kena di djoeal, lantaran prampoean begitoe ada pande sekali berpoera-poera, tetapi di loear matanja sang lelaki itoe prampoean lantes berdjalan serong. Tjoba liat sadja dengen kelakoeannja si Manis, hingga itoe Baron sampe tida merasa tjoeriga jang didalem itoe roema ada semboeni satoe lelaki djahanam.

Sasoedanja si Manis anterken babanja keloear, ia laloe toetoep pintoe kombali dan berdjalan masoek menoedjoe ka kamar No. 100, disitoe lantas berkaok sembari kakoeken soewaranja seperti lelaki: "Siapa itoe di karkoes ?"

Ini kaokan telah membikin sanget kaget hatinja itoe alap-alap, bahoewa ia pikir jang itoe Baron soeda dapet taoe jang ia ada semboeni disitoe.

,,Wah! tjilaka goea ini sekali, kaloe dia djotos sadja si engga kenapa, melengkan moeka mateng biroe, tetapi kaloe goea di kasi makan blinjoe wadja, tentoe djiwa goea melajang ka Acherat, sedeng dia poenja bini moeda blon kena goea goda", meratap itoe alap-alap jang pengetjoet didalem hatinja, dan merasa menjesel jang ia soeda toeroetin napsoenja.

,,Siapa itoe si ?" kata si Manis poelah dengen soewara orang prampoean, sembari boeka pintoe karkoes. Ketakoetan di dalem hatinja itoe djahanam sekoenjoeng-koenjoeng tertoekar dengen kegirangan, talkala ja soeda kenalin soearanja si Manis, jang telah berdiri di hadepannja.

,,Ach! tjilaka betoel, saja kira Nona poenja Baba kebikin saja djadi kaget sadja !" kata itoe alap-alap.

,,Kesian anak orang, dateng kemari boekan di kasi tidoer di randjang, tetapi di soeroe semboeni di karkoes!" kata si Manis, sembari toentoen tangan ia poenja ketjintahan,

,,Wah! kaloe saja engga kasian pada Nona, jang Nona nanti djadi tjilaka soeda tentoe tadi saja poekoel kapalanja Nona poenja Baba!"

,,Kenapa-an si Engko misti riboet, kaloe dia soeda pergi, saja poenja diri toch djadi Engko jang poenja !"

Lantaran tida maoe membikin banjak rewel pada itoe Nona moeda, maka ia tida maoe tanja apa jang itoe Baron soeda berboeat baroesan didalem kamar, hingga ia soeda kena menoenggoe lamanja satoe djem lebi, tetapi ia laloe menanja: Apa sekarang Nona poenja Baba soeda poelang ?"

,,Ha! Ha! Ha!" tertawa si Maris dan laloe berkata: Kaloe dia blon poelang, masa saja brani samperin Engko ?" Nona poenja Baba sebenter apa balik lagi engga ka sini, kaloe dia balik lagi, baekan 'ngko poelang sadja!" kata itoe pengetjoet jang masi merasa takoet.

,,Ha Engko si kaja anak ketjil sadja begitoe ketakoetan, saja orang prampoean hatinja engga begitoe ketjil kaja Engko !" djawab si Manis, jang laloe pelok itoe djahanam dan tjioem pipi kirinja.

,,Boekan begitoe Na, orang poenja oemoer boekan tjoema sahari dan semalem, kaloe ini malem kita engga ada djodo, besok malem sadja kita boleh ketemoe lagi!"

,,Djodo apa si, apa kiranja saja anak prawan? Kaloe 'ngko engga soeka, maoe poelang, poelang da gi, masa Manis maoe keremin Engko, kaloe ‘ngko sendiri engga soedi sama saja saorang djelek!“ kata itoe djingge dengen roepa jang doeka lantaran keinginanja telah di tampik.

„Do! baroe ‘ngko kata begitoe adja Nona maoe mara! Djangan dong begitoe, kan djadi bikin kasel adja ‘ngko poenja hati!“ kata itoe alap-alap jang laloe bales memelok dan tjioem pipinja si Manis jang ‘empoek serta wangi, dan raba-raba badannja itoe djinge jang sedeng kentjengnja dan berlaga kesalahan langgar orang poenja tete jang montok hingga lelaki kedji itoe merasa jang dirinja seperti kena sama hawa electris, sampe ia poenja sekoedjoer toeboenja pada goemeter.

Tetapi di itoe waktoe ia dapet inget lagi, bahoewa dirinja boleh terantjem bahaja lantaran ia soeda brani masoek di roema orang dan goda orang poenja bini moeda; tetapi sebole-bole ia tabaken hatinja, maka seande katanja di depan itoe kamar ada api jang lagi sedeng mengkobar, tentoe tra oeroeng ia nanti lompatken, kerna pengaroe ke-eilokan ada sanget besar!

Maka koetika si Manis adjak ia masoek ka dalem kamar, ia laloe toeroet sadja dengen tiada mengoetjapken lagi sepata perkatahan „takoet“ atawa “nanti sadja laen malem“, ini doea perkatahan itoe alap-alap tiada maoe keloearken lagi malahan ia sendiri kepengen bisa lekas sampe di dalem „Sorga Doenia“, soepaja ia bisa lekas dapat kesenangannja itoe, „Sorga Doenia.“

„Wah kenapa seprenja aoet-aoetan ni, Na ?“ kata itoe alap-alap, sembari baringken dirinja di atas itoe randjang.

„Itoe si tadi Baba dia mara-mara, bolehnja sepre orang dia oesak-asik!" kata si Manis jang maoe toetoep resianja.

Dengen tida berkata lagi, itoe alap-alap laloe gantoeng lagi badjoenja dan kasi keloear satoe botol pil jang ia bole dapet bli dari sala satoe Senseh jang soeda termashoer prihal membikin „Sengtji“ (Jowan boeat bikin prampoean tjinta pada orang lelaki).

Ia boeka toetoepnja itoe botol, dan ambil satoe bidji pil taro di ia poenja tangan dan pegang itoe pil dengen hati-hati soepaja tida djadi djato, kerna ini jowan aken digoenaken, apabila soeda sampe waktoenja.

„Hai! kaloe ini malem saja di djemoer, tentoe saja poelang ka roema TONGBETIAUW, apa lagi randjang saja banjak bangsatnja tentoe saja tida bisa tidoer poeles teroes sampe pagi!“

„Kesian anak oewong, saja djoega penasaran dong, kaloe kita engga plesir ini malem !“

„Kenapa nona kata begitoe si, apa Nona tadi bion dapet tjoekoep kesenangan dari Nona poenja Baba ?“

Sementara itoe si Manis telah berdoedoek di pinggir randjang, sedeng itoe alap-alap doedoek di sampingnja, sembari pelok orang poenja leher jang djoengdjang, dan matanja ada memandang pada itoe prampoean eilok dengen bernapsoe.

„Pan tadi Nona kata jang Nona poenja Baba engga taoe dateng malem, kenapa ini malem dia dateng kamari, kaloe begitoe Nona soeka membohong?“

Taoelah dia, tetapi doeloe-doeloe si dia blon taoe dateng malem, masa si saja maoe bolongin sama ‘ngko!’ kata si Manis, jang laloe bales memelok lehernja itoe djahanam dengen kras.

„Ajo dong Na! kita tidoer, saja poenja mata soeda terlaloe ngantoek!“ kata si Teck Long, seraja berlaga mengoewap.

Itoe pengeret jang tiada taoe maloe laloe minta si Manis boeat boeka badjoe kebajanja; poen ini bini moeda jang bopan dengen tiada merasa likat lagi lantes boeka penetinja dan gantoeng dia poenja badjoe kebaja, hingga badannja jang montok tjoema tertoetoep sadja dengen koetang renda jang di pinggirnja di pake in pita dadoe, dari kebagoesan ia poenja toeboe, kita tida sanggoep loekisken, tetapi di sini kita maoe kasi inget pada pembatja, bahoea pada waktoe lima blas taon jang telah liwat, di Kongsie Besar disini, ada di pertoendjoeken Gambar Lilin dimana orang bisa liat njata kebagoesannja toeboenja orang orang prampoean.

Dengen berpakean begitoe ia laloe naek kombali ka atas pembaringan, sembari rebaken badannja.....................................

Lantaran pengaroenja itoe pil si Manis djadi sanget tergila-gila pada itoe pengeret, hingga itoe prampoean moeda tida inget lagi pada ia poenja Baba, maka segala kemaoeannja itoe alap-alap si Manis tiada bisa menampik, sebegimana pembatja nanti menjaksiken di bawa ini.

Apa tadi Nona poenja Baba ada kasi oewang blandja, apa engga?" tanja itoe pengeret dengen lakoe, seperti orang jang banjak oewang.

„lja, dia kasi!" menjaoet si Manis dengen plahan.

„Brapa dia kasi Nona seboelan?"

„Seboelan seratoes roepia !"

„Djadi tadi dia soeda kasi Nona seratoes roepia dong?"

„Ja !"

„Abis Nona maoe boeat apa itoe oewang ?"

„Saja simpen adja wangnja !"

„Oewang si boeat apa di simpen-simpen, masa mati bawa-bawa oewang !"

„Abis boeat apa dong Ko ?"

„Kita kaij, itoe doeit boeat pergi djalan-djalan, mandi di Pedjongkoran besok pagi; kaloe Nona poenja oewang abis, bole minta lagi, kaloe dia engga kasi, Nona misti berlaga oga-ogahan ladenin padanja, tentoe dia takoet!" „Dimana Pedjongkoran? saja blon taoe pegi!"

„Pedjongkoran ada satoe tempat mandi, letaknja deket Tandjong Priok, kaloe Nona pegi kasana, Nona bisa mandi di laoet srenta Nona bisa dapet liat kapal-kapal jang dateng dari laen negri, atawa jang brangkat dari itoe plaboean. Disana kita bole sewa roema boeat menginep semaleman dengen pembajaran seringgit, makanan djoega kita bisa dapet bli disitoe."

„Abis saja takoet jang Baba nanti dateng kamari dan mendapet taoe saja tiada di roemah."

„Engga masa dia maoe banin si!""

„Apa si banin ?"

„Engga, 'ngko maoe bilang, masa dia dateng lagi si!" Dari sini kita naek apa ?"

„Kita naek sado adja teroes sampe di Pedjongkoran, biar mahal sedikit tida djadi apa, sebab kaloe kita naek kreta api orang nanti dapet liat kita berdoewa."

„Poekoel brapa 'ngko maoe brangkat dari sini?"

„Poekoel anam ke, sekarang soeda poekoel brapa ah ?"

„Pan tadi lotjeng soeda berboenji tiga kali, apa 'ngko engga denger?"

„Engga, kenapa bolehnja begitoe tjepet pagi ?"

„Tadi si 'ngko tidoer!"

„Sekarang kita baekan ngomong-ngomong adja, kaloe kita tidoer nanti djadi kapoelesan!"

Maka itoe doea menoesia kedji tida brani tidoer feroes hingga terang tanah, dan pada djem anam pagi, ia orang laloe brangkat ka Pedjongkoran dengen satoė sado band karet jang pake petjoet pandjang dan tenda tertoetoep rapet.

Biarlah di sini kita brenti doeloe toetoerken perdjalanannja ini doea ketjintahan, aken soegoeken laen riwajat pada pembatja jang ada berhoeboeng dengen ini tjerita. Pada soewaktoe pagi di Kampoeng Baroe di dalem satoe roema atep ada berkoempoel lima anak anak moeda jang lagi maen krontjong, sembari menjanji lagoe jang merdoe; maskipoen ia orang lagi sedeng plesir, tetapi roepanja ada keliatan berdoeka, kerna marika lagi menoenggoe satoe temen jang blon dateng.

„Kenapa begini waktoe si Sia blon dateng?" tanja sala satoe dari itoe anak moeda.

„la goea djoega heran semalem pan dia soeda djandji wanti-wanti, jang besok pagi dia maoe matjauw dan adjak kita pegi ka Pedjongkoran!" kata poelah laen anak moeda.

„Beng Tien ! loe soesoelin gi ka roemania!"

„Ach! goea takoet nanti Emmahnja maki-in, toenggoe adja disini sebentar djoega dia misti dateng !" kata itoe anak jang di panggil si Beng Tien.

Sedeng itoe anak-anak moeda lagi berkwatir jang itoe Sia nanti tida pegang perdjangdjian, sakoenjoeng-koenjoeng satoe sado brenti di depan itoe roema atep, dan satoe anak moeda jang baroe beroesia delapan blas taon, soeda toeroen dari itoe kandaran.

Roepanja itoe anak moeda ada tjakap sekali serta berpakean bagoes; di tangan kerenja di djeridji manis ada di riasken dengen satoe tjintjin berlian mata satoe jang berharga kira-kira lima ratoes roepia.

Dari tingka lakoenja jang agoeng ada membri kenjatahan, bahoewa ia ini ada anaknja saorang hartawan.

„Sia, wah! begini waktoe barce bisa dateng owee berame kira, Sia engga djadi pergi ka Pedjongkoran!" kata salah satoe anak moeda, tatkala meliat itoe anak moeda dateng.

„Loe engga taoe si apa sebabnja maka goea dateng begini laat, goea poenja Boetj n dapet taoe jang goea soeka matjauw dari sekola, dan dia soeda maki-maki-in goea, maka dia soeda prenta boedjang ikoet sama goea. Baek djoega goea pinter, goea soeda kasi soewapan itoe boedjang boeat toetoep dia poenja moeloet, soepaja dia tida mengadoė jang ini hari goea engga sekola!" kata itoe Sia.

„Kaja Sia si boeat apa pegi sekola lagi; kaloe Sia soeda besar, harta ada menoenggoe. Kaloe Sia pegi sekola tjape-tjapein otak sadja, lebi baek kita bikin plesir disini saban hari!" kata si Bong Kiat jang paling pande memboedjoek orang.

„Ija, goea djoega soedah bosen sekola, tapi Boetjin gosa si tjeng-tjeng dia maoe soeroe goea sekola sampe pinter; dia engga taoe si goea satoe anak jang soeda Gong......" kata itoe Sia sembari mesem sedikit.

„Ah, ajo da Sia kita brangkat sekarang, kaloe terlaloe laat, nanti engga enak kita mandi !" kata poelah si Bong Kiat.

„Abis apa troesa bli makanan doeloe disini ?" kata itoe Sia pada sekalian temen-temenja.

„Ach teroesa, kita bli makanan di sana sadja, kaloe brendi boleh djoega kita bawa dari sini."

„Kan lebi baek kita bawa viool, gitaar dan krontjong, soepaja kita bisa maen krontjong disana, tjoema sajang engga ada toekang njanjinja!" kata poelah itoe Sia.

„Toekang njanji si gampang Sia, kita sembat sadja dari Soehian orang!" kata si Bong Kiat jang lantas soeroe satoe boedjang ketjil panggil si Meriam boeat adjak pergi ka Pedjongkoran.

Tida brapa lama poelah satoe prampoean soeda dateng ka itoe tempat, maski itoe prampoean masi beroemoer moeda, tapi roepanja ada sanget djelek serta koelit moekanja item, tetapi ini prampoean ada pande sekali menjanji matjem-matjem lagoe, serta mempoenjai soewara jang aloes dan merdoe, maka banjak anak-anak moeda jang soeka padanja.

Kaloe di pikir didalem ini fatsal tentang roepanja itoe prampoean toekang njanji jang tiada berparas eilok, Toean Allah ada sanget adil sekali, lantaran Allah tiada maoe membriken pada prampoean djalang paras jang eilok dan swara jang merdoe boeat membikin orang mendjadi loepa daratan, kerna djika satoe prampoean toekang njanji jang amat pande poen ada poenja paras eilok, begimana nanti zerdjadi dengen itoe anak-anak moeda jang koerang pikiran, jang tentoe misti djadi tergila-gila pada itoe prampoean jang ada sanget pande tarik hati orang. Liat sadja, pada boenga-boenga raja jang berparas eilok, kebanjakan marika tiada betjoes menjanji, dan sebaliknja jang berparas djelek soewaranja bisa membikin kagoem orang.

Stenga djem telah berselang itoe kawanan anak moeda dengen satoe boenga raja laloe brangkat menoedjoe ka Station kreta api aken pergi ka Tandjong Priok.

Koetika kreta api sampe di Tandjong Priok, ia orang Jaloe naek doea sado aken pergi ka Pedjongkoran.

Disini kita maoe loekisken begimana pemandangan tempat mandi Pedjongkoran pada itoe masa, sebab sebagimana ang kita soeda batja boekoe-boekoe tjerita jang ada toetoerken itoe tempat mandi, tida ada begitoe trang, maka dari sebab itoe disini kita maoe kasi pembatja inget lagi, bagimana keadaannja itoe tempat pada itoe waktoe.

Di pinggir itoe laoetan ada berdiri bebrapa boea roema, maski itoe roema-roema ada sanget ketjil, tetapi ada mempoenjai satoe pertengaan dan satoe kamar tidoer. Di mana tempat pertengaan ada di sediaken satoe medja dengen ampat krosi dan satoe divan, dan didalem itoe kamar ada satoe pembaringan.

Ini roemah-roemah ketjil memang sengadja di sediaken boeat di kasi sewa pada orang-orang jang maoe tetira di pinggir laoet dengen bajar satoe ringgit boeat semaleman menginep disitoe.

Djika di ini waktoe, itoe tempat masi tinggal seperti doeloe, kita brani pastiken, bahoewa banjak anak-anak moeda jang beridoeng poeti soeka menginep di itoe tempat dengen adjak Tengkek Boerik! (Maaf pembatja).

Itoe tempat mandi ada djadi miliknja saorang Arab, jang di kasi sewa pada saorang Tionghoa.

Saban hari minggoe atawa hari besar, ada banjak orang-orang jang dateng koendjoengi itoe tempat boeat bikin seger marika poenja toeboe dengen mandi aer laoet; katjoewali pada waktoe hari perkerdjahan itoe tempat ada sanget soenji.

Begitoelah di itoe pagi, koetika ini tjerita kedjadian, si Teck Long dan Nona Manis dengen satoe boedjang prampoean soeda sampe di Pedjongkoran, dan marika laloe sewa salah satoe itoe roemah jang teseboet di atas.

„Ach Ko! Masi pagi, saja masi merasa dingin, saja takoet mandi doeloe!" kata si Manis sembari pelok tangan.

„Kaloe kita soeda toeroen mandi, engga merasa dingin lagi, ajo da! kita toekaran!" kata itoe alap-alap seraja pimpin tangannja itoe prampoean adjak masoek didalem itoe kamar boeat toekar pakean.

„Eh! enak betoel Ko!, ada randjangnja, sebentar abis kita mandi kita djangan poelang doeloe ach, kita reba-rebahan disini doeloe!" kata si Manis dengen mesem simpoel.

Lagi sekali kita harep pembatja tida boeat heran, kerna „Sengiji" poenja pengaroe, maka si Manis sampe djadi begitoe tjinta pada si Teck Long.

„Kita nginep adja disini Na ! besok pagi baroe kita poelang!"

„Abis nanti, kaloe saja poenja Baba dateng ka Gang Tjaiho bagimana!" „Engga, tentoe djoega ini malem dia pegi ka roema bini moeda jang laen, boeat apa Nona begitoe koewatir si!"

Sasoedanja ia orang toekar pakean, marika laloe toeroen mandi. Lantaran di itoe waktoe mata hari soeda moelai tjorotken sinarnja jang trang ka moeka boemi, maka si Manis laloe toetoep sebagian moeka dan kepalanja dengen sapoe tangan mera, tetapi dari potongan badannja jang bagoes, orang lantes bisa dapet kenjatahan prampoean itoe jang lagi mandi ada satoe Nona moeda.

Satenga djem telah berselang, sedari apa jang kita soeda tjeritakan diatas itoe anam anak moeda, djoega soeda sampe ka itoe tempat.

„Sia, Sia, toe prampoean, siapa jang bawa ?" kata sala satoe pengikoetnja itoe Sia.

„Taoelah! ja, tentoe itoe prampoean masi moeda, kaloe goea liat potongannja, siapa jang poenja ach ?" kata itoe Sia, sembari awasin ka djoeroesan, dimana si Manis lagi sedeng mandi.

„Apa taksirannja Sia penoedjoe, kaloe Sia maoe owee tjhio da, owee lah ada bawa browning TJAPLAK HO, kaloe lelakinja brani meta, owee nanti kasi bagiannja!" kata poelah laen anak moeda jang roepanja seperti satoe djago.

„Ach! djangan tembak sadja, perkara djiwa kan brat hoekoemannja, kita bawa sadja, tentoe djoega dia takoet tjega kita poenja kemaoean."

„Ach! djangan riboet-riboet doeloe dong, nanti kaloe itoe prampoean moekanja mimissan, tinggal kita jang kebogean!" kata poela itoe Sia.

Itoe semoewa anak-anak moeda dengen satoe toekang njanji laloe sewa satoe roemah di seblanja si Manis, dan marika laloe doedoek di pertengaän, sembari bikin stem itoe semoewa muziekinstrument. Si Manis jang meliat ada kawanan anak moeda dateng ka itoe tempat mandi, hatinja mendjadi sedikit keder; ia merasa slempang bahoewa ia poenja resia nanti djadi terboeka, apabila ada orang jang kenalin padanja, jang ia ada djadi bini moedanja Baron Lim.

„Jo da Ko naek, nanti orang kenalin kita, saja djadi tjilaka!" kata si Manis pada itoe pengeret.

Si Teck Long poen pikir lebi baek naek mandi sadja, sebab djika ia poenja resia djadi terboeka, boekan sadja ia tida nanti bisa ketemoe lagi pada itoe nona manis, malahan dirinja poen boleh terantjem bahaja.

„Toe pa dia naek toe, Sia liat da roepanja itoe Nona, apa Sia penoedjoe engga ?" kata palawanija itoe Sia.

„Wah Esaij betoel! kaloe bisa dapet broentoeng betoel 2 tetapi djangan sampe djadi gosoe ja !" kata itoe Sia, sembari mesem dan melirik pada si Manis.

Badjoe dan kaennja si Manis jang soeda djadi basa telah membikin djadi keliatan njata sekali potongan badannja, hingga itoe Sia djadi lebi bernapsoe boeat dapetken itoe prampoean jang eilok.

„Ajo da tjepetan kita maen krontjong, goea maoe sindirin padanja! kata poelah itoe Sia pada kawanannja, jang dengen sigra lakoeken prentanja dari marika poenja madjikan jang rojal. Begitoelah soewara krontjong, viool, gitar dan soeling lantas berboenji dengen santer sekali, sedeng si Meriam poen laloe menjanji dengen soewara jang merdoe.

„Wah senang betoellah itoe anak-anak moeda, Ko! dia orang maen krontjong disini !" kata si Manis jang lagi toekar pakean, kerna hatinja djoega soeda djadi ketarik oleh pengaroenja itoe tetaboean jang soewaranja amat merdoe.

Maka sasoedanja toekar pakean, si Manis laloe doedoek di pertengaän, sembari liat itoe anak-anak moeda maen krontjong. Sakoenjoeng-koenjoeng ia dapet liat satoe anak moeda jang tjakap serta berpakean netjes berdiri sembari menjanji:

„Tali, dan djeridji beradoe-radoe,
Hingga krontjong soewaranja djadi merdoe,
Kaeilokan Nona tida jang bisa padoe,
Membikin saja mendjadi rindoe!"

„Siapa itoe ?" bertreak si Meriam, sembari tepok-tepok tangan.

„Toe dia toe jang lagi doedoek!" kata itoe Sia, sembari toendjoek pada si Manis.

Di itoe waktoe si Teck Long masi ada didalem kamar lagi toekar pakean, sementara si Manis jang meliat ada anak moeda toendjoek padanja, dan dapet liat djoega jang itoe djeridji ada di riasken dengen tjintjin mata satoe, telah djadi mesem sedikit.

Hatinja itoe Sia semingkin djadi lebi brani, koetika meliat si Manis mesem, maka ia laloe menjanji lagi:

„Maen krontjong di pinggir laoetan,
Kapal jang liwat bisa keliatan,
Dateng kemari boeat loeasken pengliatan,
Tiada terdoega ketemoe satoe bidadari didalem ini oetan!"

„Ser! Ser! Ser!" bertreak poelah si Meriam.

Si Manis jang denger dirinja dialem begitoe roepa oleh itoe anak moeda, hatinja telah mendjadi semingkin mangkak, maka sembari toendjang kepala, ia mengawasin teroes pada itoe Sia.

„Pentil krontjong tida brapa soesa.
Bole di pentil djoega dengen memboeta.
Djangan Nona kata saja gila basa,
Lantaran Nona saja terlaloe tjinta !"

Begitoelah itoe Sia menjanji boeat ka tiga kalinja, sembari gape-gapein si Manis.

„Kesian! Anak orang !" bertreak si Meriam lagi sekali.

Lantaran itoe Sia ada begitoe djiat pada si Manis, maka ia laloe menjanji lagi, sembari boeka ia poenja dompet dan laloe kasi keloear selembar oewang kertas dari seratoes roepia :

„Pergi di Kongsi nonton bangsawan,
Riwajat Sampek-Engtaij telah di jeritaken,
Baek Nona ikoet saja saorang hartawan,
Apa permintaän Nona saja bisa loeloesken !"

Sahabisnja menjanji, ia laloe timpoek itoe oewang kertas pada itoe prampoean eilok jang ia penoedjoe, jang laloe poengoet itoe oewang dengen sanget girang, tetapi lantaran ia takoet jang si Teck Long nanti djadi goesar, maka ia tida brani samperin pada itoe anak moeda.

„Wah! Beswah ni!" kata sala satoe itoe pengikoet jang meliat itoe prampoean tjantik masi tinggal doedoek disitee djoega.

„Sekarang begimana Ba Sia? Saja poenja pikiran lebi baek saja samperin adjak ngomong itoe Nona, tetapi harep sekalian Baba-Baba disini djaga pada itoe lelaki, soepaja dia engga bisa tondjok saja!" kata si Meriam.

„Ajo madjoe kita berame, djangan takoet!" bertreak Bong Kiat, sembari pegang pestol.

Sebagi djoega satoe pasoekan prang, ia orang laloe madjoe samperin ka tempatnja si Manis.

Si Meriam laloe madjoe lebi doeloe, seraja berkata : „Dari kapan dateng, Na?"

„Dari pagi menjaoetsi Manis, sembari melirik pada itoe Sia.

„Nona dateng sama siapa? Itoe Baba Nona poenja apa?" menanja poelah si Meriam. „Saja dateng bertiga, itoe orang lelaki saja poenja 'ngko!" menjaoet si Manis dengen plahan.

Disini ini prampoean kedji soeda berlakoe tjerdik, boekan sadja ia soeda bisa toetoep resianja, malahan itoe alap-alap poen troesa merasa maloe, djika ia maen gila pada itoe Sia.

Maka itoe anak-anak moeda merasa tida begitoe djeri lagi boeat deketin pada itoe prampoean eilok, hingga dengen sigra marika laloe pada masoek di itoe pertengaän dimana si Manis ada doedoek.

Si Teck Long jang ada didalem kamar, koetika denger ada banjak orang pada dateng ka ia poenja tempat, hatinja djadi sanget takoet; boekan sadja ia tiada brani kloear boeat kasi bagiannja pada itoe anak-anak moeda jang soeda brani dateng ka tempatnja dengen zonder permisie, tetapi djoega ia tiada brani bertindak kloear boeat ketemoeken itoe pamoeda-pamoeda, maka ia tinggal sadja mengoempet didalem kamar.

„Nona di Betawi tinggal di mana ?" tanja itoe Sia, sembari deketin pada si Manis, sementara kawanannja ada bersedia boeat melindoengken serangannja itoe alap-alap, apa bila ia brani keloear.

„Di Betawi, saja tinggal di Angke, Ba!" menjaoet si Manis, sembari awasin betoel-betoel moekanja itoe Sia.

Hatinja lantes djadi bertjeket sedikit, koetika ia soeda memandang bebrapa säät pada itoe Sia dan mendapet kenjatahan, bahoewa potongan moekanja itoe anak moeda ada mirip betoel seperti moeka Babanja.

Seandenja ini anak moeda betoel ada djadi soedaranja ia puenja Baba, begimana ia moesti berlakoe, boeat toelak ketjintahannja ini anak moeda tentoe ia nanti mengadoe pada 'ngkonja: maka ia soeda pikir jang tida lebi baek dari ia berlaga bodo sadja dan trima ketjintahannja toe anak moeda. Boeat itoe alap-alap ia tida begitoe slempang, kerna ia taoe jang djika di kasi sedikit bagian dari itoe oewang seratoes roepia, tentoe itoe alap-alap nanti soeka bersabar aken meliatin sadja, ia bertjintahan-tjintahan sama itoe Sia begitoelah si Manis telah ambil haloean aken bisa lolosken dirinja dari segala bahaja.

„Koh, djangan berdiri sadja dong, mari dong doedoek disini ?" kata itoe prampoean dengen senjoem jang manis.

Itoe oendangan telah di, trima dengen hati jang sanget girang oleh itoe Sia, jang laloe doedoek di sampingnja si Manis, seraja berkata: „Wah! kaloe goea doedoek deket ini Nona jang tjantik, hati goea tentoe djadi bergeder sadja!"

„Apa kiranja saja poenja badan ada electrisnja, maka Baba Sia poenja hati bisa djadi bergeder!" kata si Manis jang soeda toeroet-toeroetan panggil Baba Sia.

„Ajo Na, kita mandi lagi ja, mandi rame-rame lebi enak!" kata itoe Sia, jang laloe pegang tangannja si Manis dengen kras.

„Ajolah, kaloe Baba Sia maoe adjak saja mandi lagi, masalah saja brani menampik !" kata si Manis poelah dengen hati jang sanget geli, sebab boekan sadja ia ada djadi goela-goelanja Baron Lim, tetapi adenja itoe orang moeda peen dia maoe borong sama sekali.

Sasoedanja oeijapken itoe perkatahan, ia laloe masoek ka dalem kamar, boeat toekar pakean lagi.

Disitoe ia laloe kasi taoe pada si Teck Long, bahoea itoe anak moeda jang ada di locar, ada adenja dari ia poenja Baba, dan djika ia tida ladenin itoe anak moeda, ia slempang jang ia orang poenja resia nanti djadi terboeka.

Boeat penoetoepnja ini omongan, si Manis laloe berbisik di koeping itoe alap-alap, sembari keloearken salembar oewang kertas: „Ko, engga kenapa ja, saja poenja diri toch engga bisa djadi abis; na ni doea poeloe lima roepia bocat 'ngko poenja oewang blandja, kerna baroesan itoe Sia kasi saja seratoes roepia!"

Pertama kali Teck Long berlaga seedji-seedji, tapi kemoedian ia trima djoega itoe oeang kertas.

Setelah soeda abis toekar pakean, si Manis lantes keloear dari itoe kamar, sementara itoe Sia dan kawanannja poen soeda bersedia boeat toeroen mandi.

Lantaran itoe napsoe terlaloe besar, maka itoe Sia lantes sadja pondong Nona Manis bawa ka tempat jang dalem, dan disitoe ia laloe pelok dan tjioemin pipinja itoe prampoean eilok.

Dari daratan orang tjoema dapet liat itoe doea kepala ada berada deket satoe sama laen, lagi amboel-amboelan di atas beloembang, sedeng ia orang poenja seantero toeboe ada tertoetoep oleh aer laoet.

Sementara kawanannja itoe Sia ada lagi bertjanda saling maen pelok-pelokan sama si Meriam, jang satoe lepas itue toekang njanji, sedeng jang laen laloe pelok padanja, begitoelah si Meriam di over ka sana-sini, seperti djoega satoe voetbal.

Soewara tertawanja itoe orang-orang ada sanget rioe sekali.

Maskipoen itoe alap-alap soeda dapet djigotoen, tetapi tra oeroeng ia telah djadi paktohdjiat meliat itoe pemandangan, maka di itoe waktoe djoega dengen diam-diam ia laloe brangkat poelang dengen berdjangdji pada dirinja boeat bales sakit hatinja pada itoe Sia, jang soeda hinaken padanja begitoe matjem.

Koetika ia sampe di Betawi, ia laloe toelis satoe soerat kaleng jang di adresken pada Baron Lim, dan itoe soerat ia laloe soeroe satoe toekang aer auterken ka roemanja itoe orang hartawan.

Apa maoe kebetoelan di itoe waktoe, Baron Lim masi ada di roema, maka itoe soerat boedek soeda sampe padanja di waktoe jang betoel.

Itoe Baron laloe boeka itoe soerat boedek, dan batja jang boenjinja seperti demikian :

Toean jang terhormat! Dengen hormat! Saja membri taoe pada Toean, jang Si Manis, Toean poenja bini moeda lagi maen gila sama satoe anak moeda di Pedjongkoran. Lekas soesoel padanja, dan kasi adjaran jang pantes pada itoe anak moeda jang brani goda Toean poenja djinge.

Tertinggal saja poenja tabe

MATA-MATA.

Ini soerat telah membikin hatinja itoe orang moeda djadi sanget goesar, dan dengen terepot-repot, ia laloe pergi ka Gang Tjaijho, boeat preksa ini perkara lebi djaoe.

Setelah ia sampe di sana, betoel sadja ia dapet kenjatahan, bahoewa pintoenja itoe roema ada terkoentji dari loear.

Lantaran terlaloe moerka, ia laloe naek sado petjoet pandjang dan soeroe itoe toekang sado bedal koedanja boeat soesoel pada bini moedanja di Pedjongkoran.

Sekarang baeklah kita tinggalken doeloe Baron Lim, jang dengen hati sanget moerka dan tida bisa bersabar beringin lekas-lekas bisa sampe di itoe tempat mandi aken menjaksiken dengen mata sendiri dari kebeneraunja itoe soerat kaleng; dan marilah kita meliat lagi itoe Baba Sia, jang lagi bersenang senang sama si Manis dengen tiada dapet doegahan, jang Baron Lim bakal dateng pergokkin ia orang.

Sasoedanja poeas mandi, itoe Sia dan kawananja laloe naek ka darat, sedeng makanan boeat bersantap soeda di atoer diatas medja, dan marika laloe doedoek makan, sembari ngomong-ngomong. Djem seblas, sasoedanja abis makan nasi, itoe kawanan anak-anak moeda laloe doedoek maen krontjong lagi, sementara itoe Sia dan si Manis ada di dalem kamar berdoea doea sadja.

Selagi ia orang sedeng enak plesir, sakoenjoeng-koenjoeng satoe sado band karet sampe ka itoe tempat mandi, dan satoe orang moeda soeda toeroen dari itoe kandaran.

Ini orang moeda, sebegimana pembatja bisa tebak, boekan laen orang, hanja ada Baron Lim sendiri, jang dengen sanget goesar, laloe pergi tjari ia poenja bini moeda dimana itoe roemah-roemah di pinggir laoet.

Dari djaoe ia soeda dapet denger itoe soewara krontjong dan lantes dapet doegahan, bahoewa ia poenja bini moeda tentoe lagi maen gila sama itoe kawanan krontjong.

Boeat lantas serang itoe kawanan krontjong, Baron Lim merasa sedikit keder, maka ia soeda pergi sadja tjari di roemah jang pertama, dimana ia dapetken si Ijem lagi sedeng tidoer menggeros.

Maka ia laloe tendang itoe boedjang doerhaka dengen berkata: „He, andjing, mana Nona loe?"

Si ljem jang kena di tendang, merasa sanget sakit, dan laloe djadi mendoesin dengen amat kaget, sembari bertreak: Adoe!"

„Eh, gladak, lekas bangoen! mana Nona loe ?" kata poelah itoe Baron, sembari tampar itoe boédjang prampoean.

„Ampoen! ampoen. Ba! meratap si ljem.

„Ajo lekas kasi taoe, dimana Nona loe ada, kaloe loe enggga maoe kena labrakan lagi! binatang!"

„Sa....... ja engga taoe Ba, tadi Nona adjak saja kemari, tetapi lantes saja ngantoek, dan saja lantes tidoer disini, maka saja engga dapet taoe Nona ada dimana !" kata si ljem dengen bergoemeter lantaran ketakoetan.

Ini soeara riboet riboet telah di denger eleh itoe kawanan krontjong, dan begitoe djoega itoe Sia dan si Manis jang lagi ada didalem kamar, maka marika berdoewa telah djadi goegoep.

„Tjilaka! saja ini sekali Ko! saja poenja Baba soeda dateng toe, kaloe saja di lepas abis gimana, Ko? meratap si Manis, sembari pelokin itoe Sia dengen keras.

„Na! apa itoe Nona poenja Baba, kaloe begitoe Nona djadi bini moedanja saja poenja Engko. Astaga! Tjilaka doeablas, kenapa tadi Nona engga bilang, kaloe saja taoe Nena ada djingenja saja poenja soedara toea, kan ini perkara tiada djadi begini matjem !" berkata itoe Sia, sembari tarik napas pandjang, seperti orang jang merasa sanget menjesel.

Si Manis jang meliat begitoe, djadi merasa kwatir jang ini anak moeda nanti tida made bela padanja, maka ia laloe menangis dengen segak-segoek boeat ambil hatinja itoe anak moeda.

Soeda tentoe itoe anak moeda djadi tida tega meliat djantoeng hatinja bersoesa hati, maka ia laloe berkata:

„Ja, sekarang perkara soeda djadi begini seperti bras soeda mendjadi nasi, djadi apa boleh boeat, saja nanti piara pada Nona!"

Sahabisnja oetjapken ini perkatahan, ia laloe soewilin kawanannja jang ada di loear, boeat kasi satoe tanda bahoewa ia hendak kasi prenta.

Salah satoe dari antara itoe lima orang, laloe masoek ka dalem kamar, boeat trima prentanja itoe Sia.

„Eh! Loe djangan kasi Engko goea masoek ka sini!" kata itoe Sia dengen plahan.

„Baek, Sia!" djawab itoe orang, jang laloe kasi taoe pada kawanannja jang ada di loear.

Sasoedanja merasa poeas labrakin itoe boedjang doerhaka, Baron Lim lantes madjoe pada itoe kawanan krontjong, sembari menanja dengen ketoes: „Apa si Manis ada disini?"

„Tiada Ko! owee engga taoe, siapa itoe si Manis jang Engko tjari !" kata si Bong Kiat jang paling pande mendjoesta.

„Satoe prampoean moeda namanja si Manis apa dia ada disini ?" tanja poelah itoe Baron dengen mata mendelik.

„Bosioeki Koh, sebetoelnja owee engga kenal itoe prampoean, ijoema tadi betoel, disitoe owee ada liat satoe Sianseng jang bawa satoe prampoean moeda."

„Siapa itoe orangnja ?"

„Itoe owee koerang taoe Ko, sebab owee engga kenal padanja, tetapi kaloe owee denger soewaranja, ada seperti orang Palembang, dan sahabisnja owee mandi owee engga dapet liat lagi mata idoengnja!"

Ini omongan jang soeda di oetjapken dengen soewara jang tetep dan lantjar, telah membikin itoe Baron djadi pertjaja, bahoewa ia poenja djinge tida ada di sitoe, sebab ia dapet liat djoega jang itoe semoewa orang-orang lagi sedeng asik maen krontjong, koetika ia baroe sampe di Pedjongkoran.

Maka dengen hati jang sanget penasaran, itoe Baron laloe brangkat poelang ka Betawi.

Pada waktoe sore djem ampat, itoe Sia dan kawanannja berserta sama si Manis dan itoe boedjang prampoean laloe brangkat poelang.

Si Manis takoet poelang ka Gang Tjaijho, maka ia djadi terpaksa moesti tinggal di roema atep di Kampoeng Baroe.

O! di itoe waktoe hatinja ada sanget menjesel sekali di atas ia poenja perboeatan, kerna kesenangan jang ia telah dapet tjoema boeat sementara waktoe sadja, ia moesti bli dengen harga begitoe mahal, kerna dari roemah tembok jang terias bagoes ia misti tinggal sekarang di roemah atep; itoe ada menoëndjoeken, bahoewa ia poenja bintang moelai djadi gelap. Broentoeng sekali Itoe Baron tida dapet taoe jang adenja ada piara ia poenja bini moeda, maka tida terbit pertjidrahan antara itoe doea soedara.

Saboelan Si Manis di piara ditangannja itoe Sia, lantes di oesir, sebab ternjata jang ia soeda bikin poelah perhoeboengan resia sama itoe alap-alap.

Oleh kerna si Teck Long ada satoe pengetjoet, maka lantaran takoet di labrak oleh kawanannja itoe Sia, soeda merat ka Pelembang.

Begitoelah si Manis dengen hati jang sanget menjesel laloe poelang lagi ka roema orang toeanja di Angke.

——————

Soerat dari Satoe Siotjia.

PANGKALAN BRANDAN, den 5 Augustus 1917. KAPADA Jang terhormat, Sianseng KWEE SENG TJOAN, BATAVIA. Bersama ini soerat saja minta d kasi tape apa anak-anak prampoeanja dari itoe iboe jang doerhaka sampe sekarang masi idoep? Saja poedji betoel itoe tjertia ada bagoes *) dan saja djoega merasa sanget kesian pada itoe ampat suedara, serta sanget bentji pada orang toeanja itoe. Laen tida. Tabe dari saja Siotjia, (w. g.) THIO KIE NIO. Atas Siotjia poenja poedjian, saja mengatoer banjak-banjak trima kasi, (K. S. T.) Sekarang kita maoe adjak pembatja meliat lagi, bagimana si Ros telah djadi berpisa pada ia poenja Baba jang tertjinta.

Dengen oewang seratoes toedjoe poeloe lima roepia, si Tek soeda bisa idoep manis pada si Ros boeat lamanja doea boelan, tetapi sasoedanja itoe oewang telah djadi abis, si Tek laloe poelang lagi ka roemanja boeat kedoek lagi kartong iboenja, jang selaloe toeroetin sadja apa anaknja poenja permintaän 1)^[1]

Koetika ia ketemoe pada iboenja, ia laloe berlaga seperti orang jang soeda bertobat di atas ia poenja perboeatan jang tersesat; dengen ini tipoe ia kira jang iboenja nanti djadi pertjaia dan lantes kasi oewang lagi padanja.

„Enak ja Tek, loe plesirin doeit goea doea ratoes roepia !” kata sang iboe, tatkala meliat anaknja baroe poelang.

„Owee lagi sedeng kesel, Mama maoe bikin owee djadi lebi djengkel, kaloe owee mati, kan Mama jang engga ada poenja anak lagi ?” kata si Tek, sembari oesoet-oesoet dada, dan tarik napas pandjang pendek.

„Goea maoe ingetin sama loe, boekan goea soeka loe mati, Tek!” kata sang iboe, sembari awasin pada anaknja.

„Kaloe Mama maoe ingetin, bitjara jang betoel dong, djangan kata rojalinlah Mama poenja doeit!” kata si Tek, seperti satoe anak ketjil jang aleman.

„Tek ini hari loe djangan pergi lagi, sebab sebentar loe sama goea misti anterin leloe naek kapal, dia maoe poelang ini hari !” kata sang iboe dengen sabar. „Kapan le dateng?"

„Oeda seminggoe lebi!"

„Sekarang le pergi kemana?

„Dia lagi pegi blandja ka Pasar Baroe!"

„Abis le tanja owee engga ?" tanja si Tek dengen roepa jang maloe, sebab ia takoet jang resianja nanti ketaoean oleh ia poenja le.

„Masa dia engga tanja !"

„Abis Mama kata apa?"

„Goea bilang loe lagi ngerem sama prampoean loe!"

„Ach Mama! kenapa maoe bikin sadja si ?" owee poenja maloe

„Dimana goea bisa bohongin padanja, kaloe loe engga poelang berboelan-boelan !" kata sang iboe dengen mesem, seperti orang jang ada mengandoeng satoe resia.

„Abis sebentar kaloe dia tanja owee, bagimana owee misti djawab ?"

„Ngakoe sadja teroes terang, dia soeda taoe tah!"

Sahabisnja bitjara pada Mamanja, si Tek laloe masoek ka kamarnja boeat toekar pakean, tetapi alangka kagetnja, koetika ia dapet kenjatahan, jang separo dari ia poenja pakean soeda tida ada lagi di lemarinja.

Maka ia laloe tanja pada iboenja; „Ma! Ma! pakean owee pada kamana?"

„Orang Paijkia boekan sadja badannja roesak oewangnja abis, pake pakeannja djoega toeroet-toeroetan di makan ngetnget, baek djoega keboeroe goea dapet liat, maka goea lantes kasi toekang binatoe!" djawab sang iboe dengen roepa, seperti orang jang tahan tertawanja.

Lantaran iboenja tida soeka bitjara djoesta, maka si Tek tida djadi tjoeriga,

Pada djem doea blas siang, selagi maoe doedoek bersantap tengahari, lenja si Tek soeda poelang dari Pasar Baroe.

„Baroe dateng le!" tanja si Tek, sembari berkiongtjice pada itoe tetamoe.

„Goea abis blandja di Pasar Baroe, sebab sebentar goea maoe poelang!" menjaoet sang le dengen roepa jang girang, koetika meliat si Tek soeda poelang.

„Kenapa le begitoe tjepet maoe poelang ?"

„Orang goea oeda ampir setenga boelan disini, loe engga made djalan-djalan ka Cheribon, Tek ?"

„Pikiran owee djoega maoe djalan-djalan ka sana, tetapi sekarang blon sempet si. Apa lethio dan ade Kim baek disana?"

„Semoewa seger waras Tek, si Kim sekarang soeda besar, kaloe loe ketemoe padanja, tentoe loe engga kenalin lagi!"

„lja, ceda maoe sepoeloe taon, sedari le pinda ka Cheribon, owee engga ketemoe padanja, apa sekarang dia masi sekola?"

„Oeda lama dia brenti sekola, sebab mesternja kata dia poenja pladjaran soeda sampe tjoekoep."

Selagi ia orang mengomong, satoe boedjang prampoean dateng kasi taoe jang iboenja si Tek adjak bersantap.

Dengen sigra ia orang laloe doedoek di medja makan dan sosoedanja abis dahar nasi, itoe Njonja Cheribon, laloe bitjara bisik-bisik di koeping ia poenja Entji.

Satoe boedjang lelaki, laloe di soeroe pergi ka kantoor kapal api boeat bli kartjis, sementara laen boedjang-boedjang jang ada didalem itoe gedong, lagi beresin barang-barang itoe Njonja jang maoe brangkat.

„Njonja, saja dapet ketrangan dari kantoor kapal api, jang Njonja misti ada di Tandjong Prioek djem doea tengari, sebab djem tiga kapal maoe brangkat." kata itoe boedjang jang tadi di soeroe bli karijis.

„Na, kaloe begitoe, loe bawa da barang-barang goea ka Tandjong Prioek, sebentar goea soesoel sama loe!” kata itoe Njonja Cheribon.

Itoe boedjang jang trima prenta, laloe panggil satoe grobak dan taro semoewa barang-barang kadalem itoe kandaran, kemoedian ia soeroe toekang grobak bawa ka station kreta api, aken pergi ka Tandjong Priok.

Satoe kreta koeda besar ada menoenggoe di depan itoe gedong boeat bawa itoe Njonja Cheribon ka station.

„Goea maoe brangkat da Tji, mentar loe sampe-in pada Tjihoe, jang goea bilang banjak trima kasi padanja.” kata itoe Njonja Cheribon, jang lagi maoe brangkat pergi.

„Goea maoe anterin loe sampe di kapal, mana boleh enak si loe brangkat sama boedjang prampoean sadja!” kata sang Enjti jang laloe adjak anak lelakinja boeat anterin padanja.

Si Tek jang blon dapet oewang dan merasa maloe hati pada lenja, laloe ikoet iboenja pergi ka Tandjong Prioek.

Di Plaboean Tandjong Prioek, kapal van den Bosch jang bakal brangkat ka Cheribon, soeda jadi penoe dengen penoempang-penoempang dan orang-orang jang dateng menganter sanak soedaranja atawa sobat andenja, jang maoe brangkat ka laen tempat

Njonja Cheribon, si Tek dan Iboenja telah berdoedoek mengobrol di kamar makan didalem itoe kapal.

Lantaran ia orang lagi asik mengobrol, maka marika tiada taoe jang itoe kapal soeda bersoewit tiga kali, dan moelai brangkat dari plaboean.

Koetika soeda liwat poleo Oendroes, itoe kapal moelai bergontjang, kerna itoe kapal sekarang di djalanin ada lebi keras dan djoega kepoekoel ombak.

„Eh Ma, kapal soeda djalan ni?” kata si Tek pada iboenja dengen moeka poetjet, Jantaran amat kaget, kerna ia takoet jang ia nanti kena ka bawa ka Cheribon. „Blon!” menjaoet ang iboe dengen mesem.

Sekarang si Tek baroe dapet taoe iboenja memang sengadja maoe adjak ia pergi ka Cheribon, maka ia laloe boeroe-boeroe naek ka atas dek boeat liat, apa ia masi bisa toeroen dari itoe kapal.

Di atas dek ia tjoema bisa dapet liat plaboean Betawi dengan samar, sedeng di tenga laoetan tida ada praoe ikan jang deket pada itoe kapal, maka ia djadi poetoes harapan.

Dengen oering-oeringan, ia laloe toeroen ka bawa lagi,dan dengen goesar ia berkata pada iboenja: „Mama, kaloe maoe adjak owee ka Cheribon, bilang toch tadi dengen teroes trang, abis sekarang bagimana, kaloe owee maoe toekar pakean, owee engga ada bawa badjoe!”

„Semoewa soeda sedia di sini Tek.” kata itoe Njonja Cheribon.

Lantaran maloe pada lenja, maka si Tek djadi tinggal diam sadja, tetapi pikirannja ada sanget koesoet, kerna ia tida taoe, bagimana nanti djadinja dengen ia poenja piarahan jang tertjinta di Betawi.

Begitoelah dengen tipoe jang aloes oleh ia poenja iboe jang tjerdik, si Tek terpaksa tinggalken ia poenja piarahan, sama siapa ia sebetoelnja tiada bisa terpisa seperti koelit sama daging.

Koetika si Tek sampe di Cheribon, ia telah dapet sakit kras lantaran pikirin si Ros, jang ia tiada bisa loepaken; dan si Kim anak prampoeannja ia poenja Ie, soeda rawattin padanja.

Lantaran galang goeloeng satoe sama laen, maka ia orang soeda djato tjinta, dan laloe menika.

Poen Si Ros jang soeda di tinggal oleh Babanja, laloe poelang lagi ka roema orang toeanja di Angke.

Boeat tinggal teroes di gang Semoet, ia tida ada poenja oewang boeat pikoel ongkosnja itoe roema.ater Samar, sedeng di. tenga laoetan tida ada praoe ikan e

diam sadja, tetapi pikirannja. ada sanget koesoet, kerna ia Sekarang roema ’ntjim Asie djadi rame kombali dengen itoe doewa anak-anak prampoeannja, jang telah mendjadi tjilaka lantaran perboeatannja itoe iboe doerhaka.

Tjengkauw-tjengkauw jang denger si Manis soeda di lepas oleh Baron Lim dan si Ros soeda ditinggal oleh Babanja, semoewa lantes dateng krojok pada itoe prampoean terkoetoek, minta poelang ia orang poenja barang-barang.

Ada djoega jang soeda minta pertoeloengannja politie boeat gertak pada itoe iboe doerhaka, soepaja ia orang dapet kombali barang-barangnja.

Meliat glagatnja jang tida baek, itoe prampoean jang terkoetoek, djadi sanget bingoeng dan ketakoetan.

Ia rasa jang ini sekali tentoe ia bakal masoek didalem kamar tikoes, tetapi sebrapa bisa ia masi maoe tjari djoega daja oepaja boeat lolosken dirinja dari itoe bahaja.

Maka dengen sigra, ia laloe pergi ka Petak Sinkian boeat minta Embok Saleha toeloeng tjari-in oewang.

Koetika itoe Emmah Propot denger ini kabar, hatinja djadi sanget girang, kerna ia taoe jang ini ada satoe djalan baek boeat toeroet ambil bagian aken dapetken keoentoengan dari dagangan „Koende Litjin.”

„Njonja, brapa banjak Njonja sekarang perloe pake oewang boeat toetoep Njonja poenja lobang?” tanja Embok Saleha dengen girang.

„Begitoelah, kira-kira doea roepia,” menjaoet Entjim Asie dengen moeka jang kesel.

„sampe begitoe banjak?”

„Abis brapa jang Embok bisa tjari-in?”

„Njonja, djangan sala mengarti, saja ini boekan satoe makelaar boeat tjari-in orang oewang poeat di kasi pindjem. Saja tjoema ada kenal banjak anak-anak moeda orang hartawan jang rojal, jang soeka bli anak-anak prawan boeat jadi dia orang poenja bini moeda. Kaloe Njonja maoe kasi si Nona jang paling ketjil djadi bini moeda orang lagi, ini barang kali saja djoega bini tjari-in Njonja oewang tiga-ampat ratoes roepia, boekan reboean roepia Njonja taoe sendiri ini waktoe moesin ketjeklik, anak ajem engga lakoe di djoeal mahal-mahal! Tetapi Njonja djangan poetoes harepan, kaloe si Nona soeda djadi bini moedanja Baba hartawan, barangkali djoega itoe Baba mantoe nanti bajarin Njonja poenja oetang, kan Nionja tida djadi tjilaka!”

Keadaan Entjim Asie di itoe waktoe, seperti djoega satoe orang jang soeda kedjeblos didalem djoerang, maka apa sadja jang bisa di rambet, ia maoe pegang, soepaja ia bisa keloear dari itoe lobang.

Begitoelah itoe iboe doerhaka soeda djadi moefaket dengen adjarannja Embok Saleha, dan minta ia lekas-lekas tjari-in oewang.

„Baek, Nja, lagi satoe doea hari djoega saja bisa kasi kabar pada Njonja!” kata Embok Saleha, sembari anter kaloear tetamoenja jang hendak brangkat poelang.

Tatkala Entjim Asie soeda berlaloe dati itoe gowa resia, satoe orang Tionghoa totok jang soeda banjak oemoer dengen ia poenja satoe temen, soeda masoek didalem itoe gowa boeat minta pertoeloengannja Embok Saleha, tjari-in satoe gadis.

„Embok! ini Kiai, saja poenja temen, satoe soedagar ikan asin di Pintoe Ketjil. Dia paksa saja soeroe anterin dia ka roema Embok, sebab sedari bininja mati, saban malem dia engga bisa tidoer. Sekarang dia maoe soeroe Embok tjari-in anak prawan boeat djadi bininja !” kata temennja itoe Sianseng pada Embok Saleha dengen hati jang sanget geli sekali, kerna itoe Sianseng poenja oemoer soeda lebi dari anempoeloe taon, tetapi tra oeroeng ini bandot toea masi maoe makan daon moeda. „Boleh Ba, tjoema Baba misti taoe-in sendiri, kaloe boeat djadi bininja orang banjak oemoer, tentoe orang maoe minta oewang banjak-banjak, dan barang ini itoe boeat pesalinnja baroe bisa dapet!”

„Djangan slempang Bok, sereboe roepia goea bisa kasi, asal sadja dapet jang bagoes!” kata itoe Sianseng.

Embok Saleha mendjadi sanget girang, maka ia laloe menjaoet: „Kaloe begitoe si gampang dapet, tjoema Kiai misti kasi saja ongkos dong boeat tjari ka sana-sini, sebab di Betawi ada soesahan boeat dapet anak prawan orang.”

Itoe Sianseng lantes kasi keloear selembar oewang kertas dari sepoeloe roepia, dan seraken di tangannja itoe Emmah Propot.

„Kapan Embok bisa kasi kabar?” tanja temennja itoe Sianseng.

„Besok ke, Baba adjak ini Kiai dateng lagi!”

Sasoedanja itoe oeroesan, telah djadi beres itoe doea orang laloe brangkat poelang lagi.

Hatinja Embok Saleha djadi sanget girang, boekan sadja namanja nanti djadi sanget tersohor jang ia ada begitoe pande dari perniagäan „Koende Litjin” tetapi ia poenja kantong poen nanti djadi penoe dengen oewang haram.

Maka ia laloe naek sado brangkat pergi ka roemanja Entjim Asie di Angke boeat kasi taoe ini kabar baek.

Koetika sampe disana, ia soeda di samboet oleh Entjim Asie dengen girang.

„Njonja, tadi saja soeda pegi ka roemianja satoe soedagar ikan asin di Pintoe Ketjil, sebab saja denger bininja baroe meninggal, dan saja soeda boedjoeek-boedjoek boeat soeroe dia kawin lagi, sampe dia toeroet saja poenja boedjoekan tjoema sadja dia engga maoe kasi lebi dari ampat ratoes roepia. Itoe Kiai orangnja soeda banjak oemoer tentoe dia nanti sajang pada si Nona, saja lagi maoe minta dia bli-in peneti tjarang boeat pesalinnja di Nona!”

Si Boto jang lagi berdiri di samping iboenja dengen amat kaget telah mendapet denger itoe pembitjaraän, dari pertjakepan mana ia telah djadi mengarti, jang ia poenja diri maoe di djoeal boeat djadi istrinja saorang toea, jang soeda deket masoek di lobang koeboer maka, ia soeda kirim itoe briefkaart jang ditoelis dengen tinta mera pada si Keng Hok, bahoewa ia taoe betoel jang ia nanti bisa dapet perlindoengannja itoe djedjaka jang tjinta padanja dengen segenep hati.

„Ampat ratoes roepia ja da, asal Embok toeloeng minta-in oewangnja lekasan, sebab saja misti lantes teboes barangnja Njonja Kim, kaloe engga dia maoe bikin perkara” kata itoe iboe doerhaka jang soeda kelaparan oewang.

„Baek Nja, sekarang saja nanti pergi ka roemanja, besok pagi djoega saja bisa anterin itoe oewang” kata Embok Saleha jang laloe berpamitan.

Itoe Embok Saleha laloe pergi ka Pintoe Ketjil di roemanja itoe Sianseng soedagar ikan asin, boeat kasi taoe jang Entjim Asie maoe kasi anak prampoeannja.

Itoe soedagar ikan asin telah djadi sanget girang, maka ia laloe menanja: „Embok, brapa dia minta?”

„Dia minta lima ratoes roepia!” kata Embok Saleha, sembari toendjoekin lima djeridji.

„Holah!” kata itoe soedagar ikan asin, jang laloe boeka latji kasi keloear itoe oewang lima ratoes roepia.

Ia soeda brani seraken itos oewang dengen begitoe gampang, sebab ia poenja temen soeda kasi taoe jang itoe Emmah Propot boleh di pertjaia.

Ini bandot toewa jang soeda kelaparan daon moeda itoe Mah Peropot kasi taoe pada Entjim A Sie boeat tetepken hari kawinnja di itoe minggoe djoega. Selagi itoe Mah Propot kasiken itoe wang pada itoe iboe doerhaka, ia membri taoe permintaännja itoe soedagar ikan asin pada Entjim A Sie.

Dengen girang Embok Saleha pergi lagi ka roemanja 'ntjim Asie, boeat seraken itoe oewang ampat ratoes roepia, dan jang seřatoes roepia ia teken dan kasi masoek di dalem kantongnja sendiri.

„Kaloe begitoe", sahoet itoe iboe doerhaka, sembari trima itoe wang kertas. „Noesa pandjang sadja Embok dateng ambil Nona penganten."

Maskipoen Entjim Asie soeda dapet itoe oewang, tetapi masi tida bisa tjoekoep boeat toetoep ia poenja lobang jang soeda menggerowak terlaloe besar, maka ia maoe kasi si Bɔto menta-menta sadja zonder panggil wajang tjokek atawa muziek.

Si Boto jang takoet dirinja tiada bisa lolos dari ini bahaja soeda niat boeat minoem Sublimaat, djika pada waktoe hari kawinnja Keng Hok blon djoega bisa dateng menoeloeng, kerna ia tiada maoe serahken dirinja pada itoe Bandot toewa.

Dasar peroentoengannja si Boto tida begitoe djelek seperti laen-laen soedara prampoeannja, maka satce hari di moeka seblonnja si Boto misti menika, Keng Hok dari Tegal soeda sampe di Betawi di waktoe jang betoel, sebagimana doeloe kita soeda tjeritaken.

Dari Station kreta api, Keng Hok tida poelang ka roemanja doeloe, tapi ia laloe pergi ketemoeken si Boto, itoe gadis jang ia sanget tjinta, boeat dapet taoe lantaran apa ia soeda kirim itoe briefkaart jang tertoelis dengen tinta mera.

„'Ngko!" kata si Boto dengen aer mata meleie di pipinja, koetika ia liat si Keng Hok soeda dateng, dan dengen soewara poetoes-poetoes ia paksa djoega boeat teroesken omongannja: „Harep djangan mendjadi goesar pada saja di atas saja poenja iboè poenja perboeatan, jang maoe bikin poetoes kita poenja perdjodoan. Perboeatan boesoek dari saja poenja Memeh, maskipoen saja merasa maloe boeat tjeritaken pada Enko, saja tida bisa dan tiada bole toetoep lebi lama pada Enko, kerna ampir kasep, djika Enko tiada lekas dateng, soeda tentoe saja misti terpaksa minoem ratjoen boeat pegang tegoe saja poenja perdjangdjian pada Enko, kerna saja poenja Memeh soeda trima oewang ampat ratoes roepia dari tangannja Embok Saleha, wangnja satoe soedagar toekang ikan asin di Pintoe Ketjil jang maoe menika pada saja. Ini sih melengkan Engko poenja hati, kaloe Engko ada kesian sama saja dan tida maloe lantaran perboeatan boesoek dari saja poenja iboe boeat menika sama saja, hareplah soeka lekas atoer boeat kita orang poenja kebaekan!"

„To djanganlah kata begitoe seperti djoega loe masi engga pertjaia sama goea, kaloe goea engga tjinta sama loe masalah goea begitoe terboeroe-boeroe tinggalken goea poenja perkerdjahan boeat dateng kamari!" kata si Keng Hok dengen aer mata jang berlinang-linang, sebab hatinja ada sanget kesian pada itoe gadis.

„Boekan begitoe Koh, sebab saja siempang jang 'ngko nanti djadi ketjil hati, lantaran sekarang 'ngko soeda dapet taoe keboesoekannja saja poenja Memeh !"

„Oedalah loe djangan bitjara begitoe."

„Abis bagimana Koh maoe atoer?"

„Goea nanti pergi pada itoe prampoean djahanam boeat ganti itoe oewang ampat ratoes roepia, apa loe táoe dimana tempat tinggalnja ?"

„Di Petak Sinkian. Koh!"

„Goea, maoe pergi sekarang djoega boeat oeroesin loe poenja perkara!" kata si Keng Hok jang laloe brangkat pergi menoedjoe ka roemahnja Embok Saleha. Permoela kali itoe Emmah Peropot tida maoe trima, tapi koetika ia dapet kenjatahan, bahoewa itoe gadis sendiri tida soeka djadi bininja itoe bandot toea, maka ia djadi poetoes akal dan trima djoega itoe oewang kombali.

Sasoedanja ini perkara djadi selese, Keng Hok lantas poelang ka roemanja kasi taoe pada ia poenja ajah jang ia maoe menika pada anak prampoeannja Entjek Asie.

„Entjek Asie, toekang kopi?" tanja sang ajah dengen mata mendelik.

„Betoel, Tjek !"

„Engga, goea tida soeka loe kawin sama anak prampoewannja orang boesoek!"

„Betoel Entjek dan Entjim Asie ada orang boesoek, tapi owee soeda tjinta pada si Boto dari ketjil dan owee sampe taoe ia poenja adat dan tingka lakoe ada beda djaoe dari ia poenja Entji-Entji !"

„Itoe si melengkan loe poenja soeka, tetapi lantaran goea engga moefakat loe kawin pada anak prampoeannja orang jang begitoean, goea engga maoe keloear oewang barang sepeser dan djoega goea engga maoe liat roepanja loe poenja bini!" kata sang ajah jang soeda djadi oering-oeringan lantaran anaknja tida maoe menoeroet ia poenja kata.

Keng Hok jang moesti menoeloeng dirinja ia poenja ketjintahan, soeda tida ladenin lagi omongannja ia poenja ajah dan soeda menika sama si Boto dengen sepi-sepi sadja.

Lantaran ajahnja Keng Hok masi tida maoe trima si Boto sebagi Nona mantoenja ia djadi tida senang boeat tinggal lebi lama di kota Betawi dan soeda adjak istrinja brangkat lagi ka Tegal.

Sang ajah poen lantaran terlaloe djengkel meliat kelakoeannja ia poenja anak lelaki, soeda djoeal ia poenja waroeng dan brangkat poelang ka Tiongkok. Tiga hari sasoedanja si Boto brangkat ka Tegal, Entjim Asie soeda di seret ka kamar tikoes dan dapet hoekoeman doea taon didalem pendjara, semantara Entjek Asie lantaran tida poenja oewang boeat isep madat, soeda mati lantaran ketagian apian di dalem Hoenkeng.

——————

XIII.

PENGIDOEPAN BOENGA RAJA.

Boenga raja ada satoe machloek jang paling gampang mentjari oewang, dan bisa berpakean rebo serta idoep rojal sebagi Njonja hartawan, oleh kerna ia orang boekan goenaken kepinterannja atawa tenaganja boeat mentjari pengidoepan jang halal, tetapi marika mentjari pengidoepan dengen djoeal dirinja, zonder banting toelang dan bisa poeasken plesiran doenia di waktoe moeda. Banjak prampoean-prampoean moeda jang berpikiran kliroe kira, bahoewa jang marika nanti djadi broentoeng dengen berlakoe begitoe matjem, tapi ia orang tida pikir jang badannja jang di dagangken pada begitoe banjak orang nanti lekas djadi roesak, lantaran marika moesti menoeroetin keinginannja orang-orang lelaki jang kasi oewang padanja, dan ia orang tida inget djoega jang marika nanti di serang dengen roepa-roepa penjakit kotor, hingga boleh membikin dirinja lekas masoek ka lobang koeboer.

Bagitoelah si Ros dan si Manis lantaran ia orang kira jang terlaloe soesa boeat dapet lelaki jang maoe piara teroes padanja, dan ia orang poen merasa lebi senang, djika marika tida ada poenja Baba jang melarang kehendakannja. Maka ia orang soeda sewa satoe roema di Gang Tjemara, dimana ia orang bisa beremponan dengen laen-laen prampoean djalang.

Disana sini lantes orang-orang moeda pada tjeritaken satoe sama laen jang ada mendjelema doea „Boenga Baroe" jang roepanja eilok sebagi bidadari.

Pada soewatoe hari Minggoe Soehian di Djembatan Doea, soeda dateng banjak anak-anak moeda orang hartawan, di antara mana ada bebrapa kassier bank jang dapet gadji ratoesan roepia saboelan.

Di itoe hari itoe soehian ada bikin keramean boeat merajaken pesta hari pringetan, bahoewa itoe perkoempoelan baroe didiriken, maka soeda di oendang bebrapa wajang-wajang tjokek jang terpili, dan ada sediaken roepa-roepa matjem barang hidangan jang amat lezat rasanja jang telah di pesen pada Entjek Teng Bo, toekang masak jang terkenal di Betawi.

Lid-lid dari itoe perkoempoelan dengen sengadja soeda minta si Menesa, si Botan, si Goneng dan si Kim Tjiek boeat dateng di ia orang poenja soehian, kerna ini ampat wajang ada sanget di soekai oleh anak-anak moeda hartawan.

,,Ajo moelai maen lagoe goedehel goedempal !" kata kepala dari itoe perkoempoelan pada pandjak wajang.

,,Ajo kita lim doeloe, baroe enak kita menandak!" kata poelah laen anak moeda.

Ia orang laloe boeka satoe botol brendi, dan toewang dimana gelas-gelas, serta paksa sekalian orang minoem.

Tetaboean lantes moelai berboenji, sementara itoe wajang-wajang lantes moelai tandak dan menjanji dengen soewara jang sanget merdoe.

Ajo nandak da !" kata itoe kepala dari itoe perkoempoelan jang laloe ambil satoe tjoekin dan sampirken dimana poendaknja ia poenja temen. Itoe Sianseng, jang memang ada pande sekali soder wajang, lantes sadja menandak sama wajang-wajang.

Laen-laen lid jang meliat kepandeannja itoe Siansng semoea pada tepok tangan, sementara sala satoe lid bawain satos glas brendi boeat kasi itoe Sianseng minoem.

„Ajo lim lagi ach, Djin Hong!”

„Engga ach, owee engga maoe!”

„Loe jang soeroe dia minoem si dimana dia maoe, tjoba loe soeroe si Menesa jang tjekok, tentoe dia tiada tampik !” kata poelah laen anak moeda.

Si Menesa jang taoe ia ada banjak di soekai oleh anak- anak moeda, lantes sadja ambil itoe glas brendi dari tangannja itoe lid laloe tempelken itoe glas di bibirnja itoe Sianseng, jang lantes minoem sampe kering.

„Ajo minoem lagi seglas, Ba!” kata itoe wajang jang soeda pegang lagi satoe glas jang penoe dengen brendi.

„Oeda ach! goea engga maoe!”

„Baba engga tjinta ni sama saja?”

„Masalah !”

„Nah minoem dong !” kata si Menesa, jang laloe tjekok lagi itoe anak moeda.

Orang jang soęda djato di bawa pengaroenja alkohol, apa sadja jang orang prenta ia tida merasa maloe lagi boeat djalanken, maka koetika ada jang berseroè: „Tjioem Ach!”

Sianseng Djin Hong laloe tjioem si Menesa sepoeas-poe- asnja.

Sasoedanja abis satoe babak, si Menesa laloe bawa satoe glas kosong dan samperin pada Sianseng Djin Hong, sembari menjemba.

Itoe Sianseng lantes boeka dompetnja kasi keloear satoe roepia dan taro didalem itoe glas.

„Nanti goea soeroe panggil si Ros dan si Manis tentoe ini pesta bisa djadi lebi rame lagi!" kata satoe soedagar tjita.

O! itoe boenga baroe jang tersohor !" kata temennja.

Ja tjoba panggil goea djoega kepengen liat roepanja !" kata kepala itoe perkoempoelan, jang laloe panggil satoe boedjang prampoean soeroe naek kretanja jang lagi menoenggoe di depan itoe soehian, pergi ka Gang Tjemara boeat oendang itoe doea boenga baroe.

Satoe djem telah berselang itoe boedjang soeda balik lagi dengen berdjalan sendirian, sembari berkata:,,Baba, Nona Ros dan nona Minis engga bisa dateng kemari, sebab soeda ada jang pesen lebi doeloe, dan dia ada kata djoega, kaloe engga ada selembar oewang kertas dari doea poeloe lima roepia, dia engga maoe dateng, kaloe maoe panggil padanja misti kasi taoe safoe minggoe di moeka, sebab saban hari ada adja jang panggil itoe doewa Nona tida brentinja !"

Moekanja itoe Sianseng jang djadi kepala dari itoe perkoempoelan telah djadi mera sekali, lantaran merasa jang itoe doea boenga baroe tida meliat mata padanja, dan takoet ia tida bajar boeat harga jang di minta, tapi ia tida maoe toendjoeken amarahnja di depan orang banjak, maka ia tjoema berkata sadja: „Oh! lakoe betoel itoe boenga baroe!"

Djem ampat sore satue toekang bikin portret soeda di oendang dateng ka itoe sochian, dan sekalian lid-lid itoe perkoempoelan berserta wajang-wajang tjokek telah bersedia boeat di portret.

Ada djoega bebrapa lid dari itoe sochian jang tida merasa maloe soeda doedbek dengen pangkoe wajang tjokek.

Poekoel lima sore itoe kawanan toekang plesir baroe pada boebar ka masing-masing poenja roema, tetapi itoe kepala soehian bersama satoe temennja soeda soeroe lagi itoe boedjang ka gang Tjemara boeat oendang lagi pada itoe doea boenga baroe dengen membawa seratoes roepia.

1. Inilah ada satoe pladjaran bagi Njonja-Njonja hartawan, jang telah berlakoe kliroe dengen semboeni di mata swaminja telah membri banjak wang pada ia orang poenja anak lelaki, jang ampir dewasa, kerna itoe wang di dalem tangannja anak jang koerang pikiran ada mendjadi ratjoen. Perboeatan dari itoe iboe-iboe jang berhati lemah pada ia poenja anak laki ada ketjintahan jang kliroe.